Mwenyekiti wa Kijiji cha Ilakala, kata ya Muhenda wilayani Kilosa mkoani Morogoro, Moshi Kihiki akizungumzakatika kikao na waandishi wa habari hivi karibuni.
Wajumbe wa Halmashauri ya Kijiji cha Ilakala wakiwa kwenye mkutano wa Halmashauri hiyo
Wajumbe wa kijiji wakiwa katika mkutano huo.
……………………………..
NA SULEIMAN MSUYA
“TUNAUMIA sana kuona wenzetu wa Kitunduweta, Ulaya Mbuyuni, Muhenda, Ihombwe na kwingineko wanavyonufaika na misitu yao kupitia Mradi wa Kuleta Mageuzi katika Sekta ya Mkaa Tanzania (TTCS),” hayo ni maneno ya Mwenyekiti wa Kijiji cha Ilakala, kata ya Muhenda wilayani Kilosa mkoani Morogoro, Moshi Kihiki.
Kihiki alisema hayo wakati akizungumza na waandishi wa habari kutoka vyombo mbalimbali vya habari ambao walitembelea vijiji vya Matuli wilayani Morogoro, Msolokelo Mvomero, Ulaya Mbuyuni na Kitunduweta Kilosa kuona namna mradi wa TTCS ulivyobadilisha maisha ya wanavijiji kiuchumi, kijamii na maendeleo.
Mradi wa TTCS unatekelezwa na Shirika la Kuhifadhi Misitu ya Asili Tanzania (TFCG) na Mtandao wa Jamii wa Usimamizi wa Misitu Tanzania (MJUMITA), chini ya ufadhili wa Shirika la Maendeleo la Uswis (SDC).
Mwenyekiti huyo alisema wanaumia katika mtazamo wa wivu kutokana na ukweli kuwa majirani zao wamefanikiwa kutekeleza miradi mingi ya maendeleo hali ambayo kwao ni kinyume.
Alisema wanakabiliwa na changamoto nyingi za kijamii, kiuchumi na maendeleo huku wakiwa na rasilimali misitu mingi ila wameshindwa kuitumia kama wenzao ambao wapo mradi wa TTCS.
“Tuseme kweli tunaumia kwa wivu kwani wenzetu wanatatua changamoto zao kama ujenzi wa shule, zahanati, maji na nyingine muhimu kwa kutumia fedha zinazotokana na Usimamizi Shirikishi wa Misitu ya Jamii (USMJ) baada ya kupata elimu kupitia TTCS,” alisema.
Alisema kwa sasa wanahitaji kupata mradi wa TTCS ili nao waweze kunufaika na rasilimali misitu iliyopo kijijini kwao kwani kwa sasa amepata elimu na kutambua faida wanazopata vijiji jirani.
Kihiki alisema kwa sasa wanatekeleza miradi ya maendeleo kupitia ruzuku ya halmashauri ambayo haitoshi kutatua changamoto zao hivyo kupelekea kuchangisha wanakijiji jambo ambalo kwa wenzao halipo.
Naye Mjumbe wa Serikali ya Kijiji cha Ilakala, Inviolata Mvura aliomba TFCG na MJUMITA kuwapelekea mradi wa TTCS kwa kuwa wapo tayari kuuendeleza kama walivyo majira zao.
Mjumbe huyo alisema misitu waliyonayo inatumika bila utaratibu hali ambayo inazidi kuwarejesha nyuma kimaendeleo.
“Sisi hapa Ilakala tuna misitu mingi ya asili lakini inatumiwa vibaya kwa watu kuanzisha mashamba na mifugo kuingia. Naomba nitumie nafasi hii kuwakaribisha TFCG na MJUMITA ili na sisi tupunguze maumivu ambayo tunapitia kwa sasa,” alisema.
Mvura alisema iwapo watapata elimu ya kutumia msiitu kwa njia endelevu wataweza kufikia maendeleo ambayo wenzao wamefikia.
Kwa upande wake Mjumbe wa Serikali Kijiji, Zuberi Kiokoteke, alisema kijiji chao bado kipo nyuma kimaendeleo hivyo wanaamini mradi wa TTCS ukija kwao watapata maendeleo.
Alisema shule ya Msingi Nyaranda ambayo ipo kijijini hapo ina hali mbaya hivyo wanaamini kuwa wakiwa katika mipango ya TFCG na MJUMITA wataibadilisha kuwa ya kisasa.
Ofisa Maliasili wa Wilaya ya Kilosa, John Mtimbanjayo alisema wilaya hiyo ipo katika mkakati wa kusambaza dhana ya USMJ katika vijiji vyote vyenye misitu ya asili na Ilakala kinaweza kuwa kimojawapo.
“Sisi halmashauri tunajua faida ya USMJ hivyo tunajipanga kwenda katika vijiji vingine venye misitu ya vijiji kuwapatia elimu kuhusu uhifadhi lengo likiwa ni kuwa na jamii inayotambua faida za misitu,” alisema.
Mtimbanjayo alisema mradi wa TTCS kwa kipindi cha miaka saba ya kuwepo Kilosa umefanikiwa kuingizia vijiji takribani 16 kati ya 20 zaidi ya shilingi bilioni ambapo halmashauri imepata takribani shilingi milioni 100.
Ofisa Sera na Majadiliano wa MJUMITA, Elida Fundi alisema wameamua kuwapitisha waandishi wa habari katika vijiji ambavyo havina mradi ili wasikie kilio cha wanavijiji hao.
Fundi alisema mwamko wa vijiji kutekeza USMJ ni mkubwa hivyo ni jukumu la Serikali kupitia halmashauri yake kutekeleza kwa vitendo USMJ kwa kuwa ina manufaa chanya.
“Nadhani mmesikia kilio cha wanavijiji wenye misitu ya asili ni kupewa elimu namna ya kuitumia misitu kwa njia endelevu kama wanavyofanya wenzao wa vijiji 20 hapa Kilosa,” alisema.
Ofisa huyo alisema iwapo vijiji vyote vyenye misitu ya asili ambayo inaweza kutumika na kujizaa upya vingeweza kuwekeza katika dhana ya TTCS ni wazi kuwa wanavijiji wengi watanufaika.
