MWALIMU AIOKOA YANGA BOTSWANA, LIGI YA MABIGWA AFRIKA

Mabingwa wa Ligi Kuu Tanzania Bara, Young Africans SC (Yanga), wameanza safari yao ya msimu mpya wa Ligi ya Mabingwa Afrika kwa kulazimisha sare ya bao 1-1 dhidi ya Gaborone United ya Botswana.

Mchezo huo wa kwanza wa raundi ya awali umechezwa leo, Septemba 5, 2026, nchini Botswana.

Gaborone United walitangulia kupata bao dakika ya 32 kupitia Obry Ambrosius, kabla ya Yanga kusawazisha dakika ya 90+5 kupitia Selemani Mwalimu na kuifanya timu hiyo ya Tanzania kurejea nyumbani ikiwa na sare muhimu.

Safari ya Yanga katika mashindano ya Ligi ya Mabingwa Afrika ina historia ndefu, ikiwa imeanza tangu miaka ya 1960. Klabu hiyo imewahi kufika hatua ya robo fainali ya Ligi ya Mabingwa Afrika mara tatu, mwaka 1970, 1971 na 2024.

Msimu wa 2023/24 ulikuwa miongoni mwa misimu iliyoweka historia kubwa kwa Yanga katika Ligi ya Mabingwa Afrika. Timu hiyo ilifika robo fainali na kukutana na Mamelodi Sundowns ya Afrika Kusini.

Baada ya timu hizo kutoka sare ya 0-0 katika michezo yote miwili, Sundowns iliiondoa Yanga kwa mikwaju ya penalti.
Kabla ya hapo, Yanga ilikuwa imeonyesha uwezo mkubwa katika michuano ya kimataifa msimu wa 2022/23, ilipofika fainali ya Kombe la Shirikisho Afrika (CAF Confederation Cup), ambapo ilimaliza ikiwa mshindi wa pili.

Katika misimu ya hivi karibuni, Yanga imekuwa miongoni mwa klabu za Tanzania zinazoshiriki mara kwa mara katika hatua za juu za mashindano ya CAF.

Msimu uliopita, ilifanikiwa kuvuka hatua za awali na kufuzu hatua ya makundi ya Ligi ya Mabingwa Afrika baada ya kuiondoa Silver Strikers ya Malawi kwa jumla ya mabao 2-1.

Msimu mpya, ukurasa mpya
Safari ya msimu wa 2026/27 imeanza Botswana, ambapo Yanga imekutana na Gaborone United katika mchezo wa kwanza wa raundi ya awali.

Timu hizo zinatarajiwa kukutana tena katika mchezo wa marudiano utakaochezwa Septemba 12, 2026.

Kocha mpya wa Yanga, Manqoba Mngqithi, ameweka wazi azma ya kuifikisha timu hiyo mbali zaidi ya ilipowahi kufika katika historia yake ya Ligi ya Mabingwa Afrika.

Lengo kubwa ni kuvuka hatua ya robo fainali na kuiwezesha Yanga kuandika historia mpya katika soka la Tanzania na Afrika.