NA DENIS MLOWE , MIGOLI
CHAMA Cha Mapinduzi (CCM) kimehitimisha rasmi kampeni zake za uchaguzi mdogo wa Jimbo la Isimani kwa mkutano mkubwa wa hadhara uliofanyika eneo la Migoli, ambapo viongozi wa chama walionesha matumaini makubwa ya kupata ushindi kupitia mgombea wake wa ubunge, Emanuela Mtatifikolo.
Akihutubia mamia ya wananchi waliojitokeza katika mkutano huo wa kufunga kampeni, Mwenyekiti wa Umoja wa Wanawake wa CCM (UWT) Taifa, Mary Chatanda, aliwahamasisha wananchi kutumia haki yao ya kikatiba kwa kujitokeza kwa wingi siku ya kupiga kura, akieleza kuwa chama kimefanya kazi kubwa ya kuwafikia wapiga kura katika maeneo yote ya jimbo hilo.
Chatanda alisema ushindi wa CCM utatokana na ushirikiano wa wanachama na wananchi, huku akiwataka wanawake kuwa mstari wa mbele katika kuhamasisha familia zao kushiriki uchaguzi huo.
Mratibu wa kampeni za CCM katika uchaguzi huo, Solo Kasaba, alisema chama kimeendesha kampeni zake kwa mafanikio katika kata zote za jimbo hilo, kikifanya mikutano mingi ya hadhara na kuwafikia wananchi katika vijiji vyote vya Isimani.
Kwa upande wake, Mwenyekiti wa CCM Wilaya ya Iringa, Constantino Kiwele, alisema mgombea wa chama amekuwa karibu na wananchi wa makundi mbalimbali ikiwemo vijana, wanawake, wazee, wafanyabiashara wadogo na waendesha bodaboda, jambo ambalo limeongeza imani ya ushindi kwa chama hicho.
Akizungumza katika mkutano huo, Mbunge wa Kalenga, Jackson Kiswaga, alieleza baadhi ya mafanikio ya maendeleo yaliyotekelezwa katika Jimbo la Isimani chini ya Serikali ya CCM. Alitaja kuimarika kwa huduma za afya kupitia vituo vya afya vilivyojengwa pamoja na utekelezaji wa miradi mikubwa ya umwagiliaji iliyolenga kuongeza tija katika sekta ya kilimo.
Naye Katibu wa NEC, Idara ya Oganaizesheni ya CCM, Issa Haji Ussi, alisema chama kina imani kubwa na uwezo wa Emanuela Mtatifikolo katika kuwatumikia wananchi wa Isimani. Alisisitiza kuwa serikali itaendelea kuwekeza katika huduma muhimu ikiwemo umeme vijijini, upatikanaji wa maji safi na salama, pamoja na maendeleo ya sekta za kilimo na mifugo.
Aliongeza kuwa juhudi hizo zinalenga kuongeza fursa za kiuchumi kwa wananchi na kuboresha maisha yao kwa ujumla.
Katika tukio lililopokelewa kwa hisia kubwa na wananchi, Mbunge wa Viti Maalum, Fatma Rembo, aliwaomba wananchi kwa dhati kumuunga mkono mgombea wa CCM, akieleza kuwa wanawake wanapopata nafasi za uongozi huleta mchango mkubwa katika maendeleo ya jamii.
Akifunga mkutano huo, mgombea wa CCM katika uchaguzi mdogo wa Isimani, Emanuela Mtatifikolo, alisema amepata nafasi ya kutembelea maeneo yote ya jimbo hilo na kusikiliza changamoto pamoja na mahitaji ya wananchi.
Aliahidi kuwa endapo atachaguliwa, atashirikiana na serikali na viongozi wengine kuhakikisha ahadi zote zilizotolewa wakati wa kampeni zinageuzwa kuwa vitendo kwa manufaa ya wananchi wa Isimani.
Mkutano huo wa kufunga kampeni ulihudhuriwa na viongozi mbalimbali wa CCM kutoka ngazi ya taifa na wilaya, wanachama wa chama hicho pamoja na mamia ya wananchi waliojitokeza kuonyesha uungwaji mkono wao kuelekea uchaguzi mdogo wa jimbo hilo.
