Katibu Mkuu wa Wizara ya Maendeleo ya Jamii, Jinsia, akizungumza wakati wa ufunguzi wa Kongamano la 5 la Uongozi wa Wanawake lililoandaliwa na Taasisi ya Uongozi (Uongozi Institute)
Mkurugenzi Mtendaji wa Taasisi ya Uongozi, Kadari Singo, akizungumza wakati wa ufunguzi wa Kongamano la 5 la Uongozi wa Wanawake lililoandaliwa na Taasisi ya Uongozi (Uongozi Institute) Jijini Dar es salaam.
………….
Katibu Mkuu wa Wizara ya Maendeleo ya Jamii, Jinsia, Wanawake na Makundi Maalum, Dkt. John Jingu, amewahimiza viongozi wanawake chipukizi barani Afrika kuchukua hatua thabiti na kuleta mabadiliko halisi katika safari zao za uongozi.
Akizungumza jijini Dar es Salaam leo Oktoba 6 / 2025 wakati wa ufunguzi wa Kongamano la 5 la Uongozi wa Wanawake lililoandaliwa na Taasisi ya Uongozi (Uongozi Institute), Dkt. Jingu alisisitiza umuhimu wa kubadilisha maarifa kuwa ushawishi na matokeo chanya.
Washiriki wa kongamano hilo wanatoka katika nchi mbalimbali ikiwemo Kenya, Afrika Kusini, Rwanda, Gambia, Zambia, Nigeria, Liberia na mwenyeji Tanzania.
“Msikae tu mkichukua maelezo,” amesema.
“Tafuta mtu ambaye safari yake inakutia moyo. Mtie moyo mwingine. Shiriki mawazo yako. Na muhimu zaidi—jitie moyo kufanya hatua moja, kuvunja kikwazo kimoja, kujenga daraja moja kwa ajili ya wengine,” ameongeza.
Amesema kongamano hilo, ambalo limekua kuwa jukwaa kuu la kuendeleza uongozi wa wanawake barani Afrika, limewakutanisha washiriki kutoka katika sekta za utumishi wa umma, biashara, elimu ya juu na mashirika ya kiraia.
Kaulimbiu ya mwaka huu, “Mchango wa Uongozi wa Wanawake Afrika,” imejikita katika falsafa ya Kiafrika ya Ubuntu—”Mimi ni kwa sababu sisi ni.”
Dkt. Jingu alieleza kuwa uongozi unapaswa kwenda zaidi ya kuvunja vikwazo vya kijinsia.
“Ni kuhusu kuunda nafasi kwa ajili ya wengine, kubadili mifumo, na kuongoza kwa huruma na ushirikiano,” amesema.
Amempongeza Rais wa Tanzania, Dkt Samia Suluhu Hassan, kama “mfano halisi na wa kuigwa wa uongozi bora wa mwanamke.”
Hata hivyo, amebainisha changamoto zinazoendelea kuwepo kama vile upendeleo wa kijamii usiojitambua (unconscious bias), mzigo wa mara mbili wa majukumu ya kitaaluma na ya nyumbani, pamoja na mapungufu ya kujiamini.
“Kongamano hili siyo tu sherehe. Ni jukwaa la ukweli, ukuaji na nguvu ya pamoja,” amesisitiza.
Kwa upande wake Mkurugenzi Mtendaji wa Taasisi ya Uongozi, Kadari Singo, amesema kuwa kuna Programu mpya ya Wanawake katika Uongozi iliyoundwa kuongeza uwakilishi wa wanawake katika nafasi za juu za kisiasa, kiuchumi na kibiashara.
“Programu hii ilizaliwa kutokana na wito wa muda mrefu wa kuchukua hatua,” amesema.
“Imesanifiwa kulingana na safari za kipekee za wanawake katika uongozi.”
Singo ameeleza kuwa washiriki walichaguliwa kwa ushindani mkubwa na tayari wamekamilisha mafunzo ya awali.
Akinukuu takwimu za kimataifa, Singo amesema kuwa wanawake wanashikilia asilimia 22 tu ya viti vya bunge na asilimia 21 ya nafasi za uwaziri—hasa katika sekta za kijamii.
“Kwa mwendo huu, inaweza kuchukua zaidi ya karne kufikia usawa wa kijinsia,” ameonya.
Afisa wa Mpango kutoka Umoja wa Ulaya, Alessandro Pisani, amesema kongamano hilo ni hatua muhimu katika juhudi za pamoja za kuweka usawa wa kijinsia kama ajenda ya kipaumbele katika maendeleo ya Afrika.
Amesisitiza ushirikiano wa Umoja wa Ulaya na Serikali ya Tanzania pamoja na UN Women katika kuondoa vikwazo vya kimfumo vinavyokwamisha uongozi wa wanawake.
Mwakilishi wa UN Women nchini Tanzania, Katherine Gifford, amesema programu hiyo ni “hitaji la maendeleo” linalopaswa kuleta zaidi ya uwakilishi wa kijinsia.
“Tunahitaji mifumo ya msaada endelevu ili kuinua wanawake kufikia nafasi za maamuzi,” alisema.
Balozi wa Finland nchini Tanzania, Theresa Zitting, aamezungumzia changamoto za kijamii zilizoota mizizi, kama vile matarajio ya kulea watoto wakiwa bado wachanga.
“Uongozi si kuhusu nafasi—ni kujitambua na kuvumilia kushindwa,” amesema.
“Tusihofu kuanguka. Tuinuke na kujaribu tena,” ameongeza.
