DAR ES SALAAM JAN. 27, 2025
NA JOHN BUKUKU
Katika Mkutano wa Wakuu wa Nchi za Afrika Kuhusu Nishati, Viongozi mbalimbali mbalimbali, Wachambuzi wa Sera, na Wadau wa maendeleo, Naibu Waziri Mkuu wa Jamhuri ya Muungano wa Tanzania, Dkt. Doto Biteko, alisimama kuwasilisha maneno yaliyojaa matumaini na maono makubwa. Sauti yake ilijaa msisitizo aliposema maneno haya.
“Mara nyingi husemwa kuwa mustakabali wa dunia ni wa Afrika. Kauli hii inahusishwa na idadi kubwa ya vijana barani Afrika pamoja na utajiri wa rasilimali zake.”
Katika hali ya utulivu wa kipekee uliotawala ukumbi wa mikutano wa Kimataifa wa Julius Nyerere (JNICC), jijini Dar es Salaam, Dkt. Biteko aliendelea kueleza kuwa mtazamo huo chanya unadhihirisha uwezo mkubwa wa uongozi wa maono wa viongozi wa Afrika.
Akiwa anakaribisha mzungumzaji aliyefuata, Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, Dkt. Biteko alimsifu kama mfano bora wa aina hii ya uongozi. Kwa maneno ya heshima, alisema:
“Tangu siku ya kwanza, Mheshimiwa Dkt. Samia Suluhu Hassan amefanya kazi bila kuchoka kuhakikisha tunakidhi mahitaji yetu ya nishati huku tukitimiza matarajio ya watu wetu.”
Kwa ufahari, Dkt. Biteko alielezea mafanikio makubwa yaliyopatikana chini ya uongozi wa Dkt. Samia. Tanzania, kupitia juhudi zake, imefanikiwa kufikia uwezo wa kutosha wa uzalishaji wa umeme, kiasi cha kuwa na ziada kubwa. Na si hivyo tu, bali kila kijiji nchini Tanzania sasa kimeunganishwa na umeme wa gridi – hatua ambayo imebadilisha maisha ya watu vijijini na kuzidisha fursa za maendeleo.
Zaidi ya hayo, alisisitiza jinsi Tanzania, kupitia uongozi wa Rais Samia, imeweza kuunganisha gridi yake ya umeme na nchi nne jirani, huku maandalizi ya kuunganisha nchi mbili zaidi yakiwa mbioni. Mafanikio haya yameifanya Tanzania kuwa kitovu muhimu cha nishati katika ukanda wa Afrika Mashariki na Kusini mwa Afrika.
Lakini mafanikio ya Dkt. Samia hayakomei ndani ya mipaka ya Tanzania pekee. Dkt. Biteko aligusia jinsi Rais Samia amekuwa mstari wa mbele katika kusukuma ajenda ya nishati safi. Alieleza:
“Yeye ndiye aliyeongoza Mpango wa Tanzania wa Nishati Safi ya Kupikia, ikiwa ni pamoja na kuanzisha mkakati wa kitaifa wa nishati hiyo. Katika majukwaa ya kimataifa, ameendelea kuwa sauti yenye nguvu, ikiwemo kuzindua Mpango wa Msaada kwa Wanawake wa Afrika kuhusu nishati safi ya kupikia wakati wa COP28 huko Dubai.”
Aidha, mchango wake kama mwenyekiti mwenza wa Mkutano wa Nishati Safi ya Kupikia uliofanyika Paris, pamoja na uongozi wake katika miradi mingine ya kimataifa inayohusiana na nishati, umetajwa kuwa hatua kubwa kwa ajenda ya maendeleo endelevu barani Afrika na dunia kwa ujumla.
Baada ya hotuba yake, Dkt. Biteko alimkaribisha Rais Samia Suluhu Hassan jukwaani. Ukumbi wote ulilipuka kwa shangwe, ukionesha shukrani na heshima kwa kiongozi huyu ambaye siyo tu kwamba ameleta nuru kwa Tanzania bali pia ameweka Afrika katika ramani ya dunia kama bara lenye mustakabali wa nishati safi na endelevu.
