SERIKALI ITAENDELEA KUTOA FEDHA ZA UTEKELEZAJI WA MIRADI-MAJALIWA.

Waziri Mkuu, Kassim Majaliwa akizindua Mradi wa Ujenzi wa Bweni katika Shule ya Sekondari Kibasila akiwa katika ziara ya kikazi wilayani Temeke, Mkoa wa Dar es salaam, Oktoba 5, 2024. Wengine kutoka kulia ni Mwenyekiti wa CCM Mkoa wa Dar es salaam, Abbas Mtemvu, Mbunge wa Mbagala, Abdallah Chaurembo, Mkuu wa Mkoa wa Dar es salaam, Albert Chalamila na wa pili kulia ni Mbunge wa Temeke, Dorothy Kilave. (Picha na Ofisi ya Waziri Mkuu)

Waziri Mkuu, Kassim Majaliwa akikata utepe alipozindua Mradi wa Ujenzi wa Bweni katika Shule ya Sekondari Kibasila akiwa katika ziara ya Wilaya ya Temeke mkoani Dar es salaam, Oktoba 5, 2024. Wengine kutoka kushoto ni Mbunge wa Mbagala, Abdallah Chaurembo, Mwenyekiti wa CCM Mkoa wa Dar es salaam, Abbas Mtemvu, Mkuu wa Mkoa wa Dar es salaam, Albert Chalamila na kulia ni Mbunge wa Temeke, Dorothy Kilave. (Picha na Ofisi ya Waziri mkuu)

Waziri Mkuu, Kassim Majaliwa akipata maelezo kutoka kwa Meneja wa Huduma za Uhandisi Mamlaka ya Bandari Tanzania (TPA), Mhandisi Erick Madinda kuhusu Ujenzi, Upanuzi na Ukarabati wa Daraja na Barabara ya Mivinjeni na Bandari One jijini Dar es salam. Alikuwa katika ziara ya kikazi wilayani Temeke Mkoa wa Dar es salaam, Oktoba 5, 2024. Kulia ni Mwenyekiti wa CCM Mkoa wa Dar es salam, Abbas Mtemvu. (Picha na Ofisi ya Waziri Mkuu)

Waziri Mkuu, Kassim Majaliwa akionesha kutoridhishwa na ukaribu uliofanywa katika ujenzi wa Hospitali ya Zakhem Mbagala jijini Dar es Salaam na kituo cha Mabasi ya Mwendo Kasi, alipokagua ujenzi wa Hospitali hiyo. Alikuwa katika ziara ya kikazi wilayani Temeke Mkoa wa Dar es salaam, Oktoba 5, 2024. (Picha na Ofisi ya Waziri Mkuu)

Muonekano wa Bweni la Shule ya Sekondari Kibasila mkoani Dar es salaam ambalo Waziri Mkuu, Kassim Majaliwa alizindua ujenzi wake akiwa katika ziara ya Wilaya Temeke, Oktoba 5, 2024. (Picha na Ofisi ya Waziri Mkuu)

…………….

WAZIRI MKUU, Kassim Majaliwa amesema kuwa Rais Dkt. Samia Suluhu Hassan ameendelea kutoa fedha kwa ajili ya utekelezaji wa miradi ya maendeleo kwenye sekta zote ikiwemo Afya, Maji, Elimu na Miundombinu ya Barabara.

Amesema hayo leo (Jumamosi, Oktoba 05, 2024) alipozungumza na wakazi wa Mbagala Kizuiani, kwenye uwanja wa Maturubai, Temeke jijini Dar es Salaam ambapo yupo kwenye ziara ya kikazi.

Amesema kuwa Serikali ipo imara na imedhamiria kuendelea kuwatumikia watanzania wote. “Niwahakikishie kuwa Rais wetu Dkt. Samia yupo imara na anaupendo kwa Watanzania, dhamira, mipango na mienendo yake ya utawala ipo safi”.

Katika hatua nyungine, Mheshimiwa Majaliwa amemuagiza Mkurugenzi Mkuu wa Baraza la Taifa la Hifadhi na Usimamizi wa Mazingira (NEMC) aende Wilaya ya Temeke na kutembelea viwanda vinavyolalimikiwa kutiririsha maji kwenye makazi ya watu na barabara.

Aidha, amemuagiza Mkurugenzi wa Manispaa ya Temeke Ndg. Jomaary Satura kuhakikisha anatumia fedha za mapato ya ndani kuweka taa za barabarani katika maeneo yote yenye uhitaji.

Pamoja na mambo mengine, Mheshimiwa Majaliwa amekagua maendeleo ya ujenzi wa Hospitali ya ghorofa sita ya Mbagala Rangi tatu ambayo ujenzi wake unatarajiwa kugharimu shilingi bilioni 10.85 na itasaidia kulaza wagonjwa 165.

Ujenzi wa hospitali hiyo utasaidia kuboresha huduma za afya zikiwemo za kibingwa, kutoa huduma ya upasuaji mkubwa, huduma za dharura, kupunguza msongamano uliopo kwa sasa, kuongeza wigo wa utoaji huduma kwa

wananchi, kupunguza rufaa zisizo na ulazima na kuhudumia wananchi wa Mbagala na maeneo ya jirani.

Pia, Mheshimiwa Majaliwa alikagua Ujenzi, Upanuzi na Ukarabati wa Daraja na Barabara ya Mivinjeni na Bandari One jijini Dar es salam.