Mkuu wa Mkoa wa Dar es Salaam, Mhe. Albert Chalamila, amekabidhi magari mawili aina ya Prado TX kwa wakuu wa wilaya za Kinondoni na Temeke ili kuwasaidia katika kuboresha huduma kwa wananchi. Magari hayo yatasaidia kuwawezesha viongozi hao kuwafikia wananchi kwa urahisi, hasa wakati wa kufanya ukaguzi wa miradi ya maendeleo.
Akizungumza leo, Septemba 30, 2024, jijini Dar es Salaam, Mhe. Chalamila alieleza kuwa magari hayo, yaliyotolewa na Rais, yanalenga kuwawezesha wakuu wa wilaya kufanya kazi kwa ufanisi zaidi, ikiwemo kutembelea maeneo ya miradi na kuimarisha huduma kwa wananchi hata wakati wa usiku. Alisisitiza umuhimu wa kuyatumia magari hayo kwa malengo yaliyokusudiwa, hususan katika kipindi hiki cha uchaguzi wa Serikali za Mitaa mwaka huu na Uchaguzi Mkuu mwaka ujao.
Katibu Tawala wa Mkoa wa Dar es Salaam, Dkt. Toba Nguvila, alieleza kuwa serikali imetenga fedha kwa ajili ya kununua magari hayo ili kusaidia utekelezaji wa majukumu ya wakuu wa wilaya hizo.
Wakuu wa Wilaya ya Kinondoni, Mhe. Saad Mtambule, na Wilaya ya Temeke, Mhe. Sixtus Mapunda, waliwashukuru kwa msaada huo na kuahidi kutumia magari hayo kuimarisha utoaji wa huduma kwa wananchi, ikiwa ni pamoja na kutatua migogoro mbalimbali kwa haraka na ufanisi.
