**Kampuni ya GAKI Investment Yapongezwa kwa Kuongeza Tija Katika Kilimo cha Pamba**
Kampuni ya GAKI Investment Ltd., inayomilikiwa na Bw. Gaspar Kileo, imepongezwa kwa uwekezaji wake madhubuti na wenye tija katika ununuzi wa zao la pamba, hususan kwenye kata za Mbutu, Kishapu, na Meatu. Waziri wa Kilimo, Mhe. Hussein Bashe, alitoa pongezi hizo alipofanya ziara katika kiwanda cha kampuni hiyo mkoani Shinyanga mnamo tarehe 12 Septemba 2024.
Waziri Bashe aliisifu kampuni ya GAKI kwa ushirikiano wake na Bodi ya Pamba katika kuajiri Maafisa Ugani 15 kupitia mpango wa BBT Ugani. Mpango huo umewezesha wakulima wa pamba katika kata hizo tatu kuongeza mavuno yao kutoka kilo 200 hadi kilo 1,000 kwa ekari, kupitia elimu ya kilimo bora. “Mnatoa mfano mzuri wa namna sekta binafsi inaweza kushiriki kikamilifu katika kuboresha uzalishaji wa kilimo,” alisema Waziri Bashe.
Mpango wa BBT Ugani unahusisha kupeleka Maafisa Ugani vijijini, ambapo kila kijiji kinapata Afisa Kilimo mmoja kwa lengo la kutoa huduma bora za ugani kwa wakulima. Kwa ushirikiano wa kampuni kama GAKI, mpango huo umeonesha mafanikio makubwa, huku wakulima wakiongeza tija katika uzalishaji wa pamba.
Mhe. Bashe pia alieleza kuwa Serikali itaendelea kutoa ruzuku za mbolea na mbegu, pamoja na kuongeza huduma za ugani ili kuhakikisha uzalishaji unakuwa na tija zaidi. Aidha, alitaja juhudi za Serikali kutoa matrekta kwa vijiji, kwa lengo la kila kijiji kuwa na matrekta mawili ili kusaidia shughuli za kilimo.
Ziara hiyo iliwashirikisha viongozi mbalimbali wa Mkoa wa Shinyanga, akiwemo Mkuu wa Mkoa, Mhe. Anamiringi Macha, pamoja na wawakilishi kutoka Wizara ya Kilimo. Uwekezaji wa GAKI Investment umeonekana kuwa mfano wa jinsi sekta binafsi inavyoweza kuchangia maendeleo ya kilimo na ustawi wa wakulima wadogo nchini.
