Dar es salaam
Imeelezwa kwamba zaidi ya shilingi trilioni 1.8 zilichangiwa na Kampuni zinazojishughulisha na sekta ya Uziduaji katika Rasilimali madini ,Mafuta na gesi asilia nchini.
Hayo yamebainishwa leo Septemba 11 , 2024 na waziri wa madini Mhe.Anthony Mavunde wakati wa akizindua ripoti ya 14 ya Taasisi ya Uhamasishaji , Uwazi na Uwajibikaji katika Rasilimali za Madini, Mafuta na Gesi asilia kwa Mwaka wa Fedha wa 2021/2022.
Waziri Mavunde amesema kuwa ripoti hii inaonyesha mchango wa sekta hizo kwa jamii ambapo amewataka wadau wa maendeleo kutumia takwimu zilizopo katika ripoti hiyo katika mijadala, warsha na makongamano mbalimbali yanayohusu maendeleo ya nchi hususani katika sekta husika.
Akielezea kuhusu ulinganisho wa mapato kutoka katika makampuni , Waziri Mavunde ameeleza kwamba ripoti hiyo inaonesha ulinganisho wa mapato kutoka katika kampuni 44 , ambapo kampuni 26 za madini, kampuni 7 za gesi asilia na kampuni 11 za hutoaji huduma kwenye mnyororo mzima wa thamani madini, mafuta na gesi asilia.
Akifafanua kuhusu mafanikio ya Mpango wa Ushirikishwaji wa Jamii katika utoaji huduma migodini , Waziri Mavunde ameeleza kuqa katika mwaka wa 2023/2024 kiasi cha shilingi trilioni 3.1 zilitumika kwenye manunuzi ya bidhaa na utoaji huduma katika sekta ya madini.
Naye, Mwenyekiti wa Kamati ya kudumu ya Bunge ya Nishati na Madini Dkt.Mathayo David Mathayo ameipongeza kamati ya TEITI kwa kazi nzuri ikiwa pamoja na kuweka kipaumbele cha uwazi na uwajibikaji kwenye mapato yatokanayo na madini , mafuta na gesi asilia kwa manufaa ya taifa.
Kwa upande wake, Naibu Katibu Mkuu Msafiri Mbibo , ameipongeza TEITI kuwa taasisi rasmi inayojisimamia katika masuala ya uziduaji ambapo kupitia ripoti zake inajibu maswali mbalimbali kwa jamii na wadau husika yanayohusiana na uziduaji kwenye sekta ya Madini , mafuta na gesi asilia.
Awali , akielezea kuhusu mwenendo wa utoaji ripoti na mafanikio yake , Mwenyekiti wa kamati ya TEITI Ludovick Utouh amesema kuwa mwezi Novemba 2023 , Bodi ya EITI iliwasilisha ripoti ya kuonesha kuwa Tanzania imeingia daraja la tatu kwenye kutekeleza viwango vya kimataifa kutoka katika taasisi ya EITI.
Utouh ameongeza kuwa, kwenye viwango vya upimaji vya EITI kwa mwaka 2019, TEIT ilipata asilimia 82.5 kwenye ushirikishwaji wa wadau na asilimia 73.5 kwenye uwazi.
Akielezea majukumu ya TEITI , Kaimu Katibu Mtendaji Mariam Mgaya amesema , TEITI ina majukumu mbalimbali lakini moja ya jukumu lake kubwa ni kuhakiki na kuwasilisha ripoti ya uwajibikaji wa kampuni katika ulipaji wa mapato na kodi kwa kampuni za uziduaji katika sekta ya madini , mafuta na gesi asilia nchini.
