Waziri Mkuu Kassim Majaliwa akifungua kitambaa kuashiria uzinduzi wa Kiwanda cha kutengeneza virutubishi cha SANKU kilichopo Mikocheni Jijini Dar es Salaam, Juni 15, 2024. Wengine pichani kutoka kushoto ni Naibu Waziri wa Viwanda na Biashara Exaud Kigahe, Mkurugenzi Mkuu wa kiwanda hicho Felix Church, Waziri wa Afya Ummy Mwalimu na kulia ni Naibu Waziri Ofisi ya Waziri Mkuu (Sera, Bunge na Uratibu) Ummy Nderiananga.(Pcha na Ofisi ya Waziri Mkuu)
Waziri Mkuu Kassim Majaliwa akikata utepe kuashiria uzinduzi wa Kiwanda cha kutengeneza virutubishi cha SANKU kilichopo Mikocheni Jijini Dar es Salaam, Juni 15, 2024. Wengine pichani kutoka Kushoto ni Mkuu wa Mkoa wa Dar es Salaam, Albert Chalamila, Naibu Waziri wa Viwanda na Biashara Exaud Kigahe, Mkurugenzi Mkuu wa kiwanda hicho Felix Church, Waziri wa Afya Ummy Mwalimu na kulia ni Naibu Waziri Ofisi ya Waziri Mkuu (Sera, Bunge na Uratibu) Ummy Nderiananga.(Picha na Ofisi ya Waziri Mkuu)
Waziri Mkuu, Kassim Majaliwa akizungumza baada ya kuzindua kiwanda cha kutengeneza virutubishi cha SANKU kilichopo Mikocheni Jijini Dar es Salaam, Juni 15, 2024. (Picha na Ofisi ya Waziri Mkuu)
Baadhi ya washiriki wa uzinduzi wa kiwanda cha kutengeneza virutubishi cha SANKU kilichopo Mikocheni Jijini Dar es Salaam wakimsikiliza Waziri Mkuu, Kassim Majaliwa alipozungumza baada ya kuzindua kiwanda hicho, Juni 15, 2024. (Picha na Ofisi ya Waziri Mkuu)
…………………….
*Ataka Mikoa inayoongoza ianze urutubishaji wa chakula kuanzia ngazi za vijiji
WAZIRI MKUU Kassim Majaliwa ameitaka Mikoa yenye viwango vikubwa vya upungufu wa damu na udumavu ianze kutekeleza mpango wa urutubishaji wa chakula kuanzia ngazi ya vijiji ili baada ya miaka mitano kuanzia sasa zaidi ya nusu ya Watanzania wawe wanatumia chakula kilichorutubishwa.
“Hatua hii itachochea kasi ya kupungua kwa vifo vya akina mama wanaojifungua pamoja na watoto wachanga kutokana matatizo yanayohusiana na upungufu wa damu mwilini, na kupungua kwa kinga mwili. Vilevile, itapunguza matatizo ya vichwa vikubwa na mgongo wazi kwa watoto.”
Pia, Waziri Mkuu ameitaka Wizara ya Afya, Ofisi ya Rais TAMISEMI pamoja na wadau wote wa lishe washirikiane katika kuandaa mkakati mahsusi wa kuelimisha umma na kuhakikisha wananchi wanapata uelewa mpana wa umuhimu wa virutubishi vinavyochanganywa kwenye chakula katika kukabiliana na changamoto za lishe duni.
Ametoa maagizo hayo leo (Jumamosi, Juni 15, 2024) wakati wa Uzinduzi wa Kiwanda cha Kutengeneza Virutubishi na Tovuti ya Wasindikaji Chakula Tanzania kilichipo Mikocheni jijini Dar es Salaam. Amesema ili kulinda afya za walaji, wasindikaji wote wazingatie namna ya kutunza virutubishi na vinyunyizi vya virutubishi ili visiharibike. Kiwanda hicho ni cha kwanza kwa Afrika Mashariki na cha pili kwa Afrika.
Waziri Mkuu amesema uzinduzi wa kiwanda hicho ni sehemu ya mkakati mpya wa juhudi za Serikali na washirika wake katika kuwezesha usindikaji bora zaidi na uwekaji virutubishi kukidhi mahitaji ya mwili. “Urutubishaji huo utaendelea kupunguza viwango vya vifo vya akina mama wanaojifungua pamoja na vifo vya watoto wachanga vinavyotokana na matatizo yanayohusiana na upungufu wa damu mwilini.”
Amesema urutubushaji huo utaimarisha afya ya watoto wa kike walio katika rika balehe kwa kuwapunguzia changamoto ya upungufu wa damu, vilevile utasaidia kuimarisha afya za watoto kwa kukabiliana na tatizo la kupungua kinga mwilini ambalo ni chanzo cha watoto kuugua mara kwa mara, lakini pia kupunguza matatizo ya vichwa vikubwa, mdomo sungura na mgongo wazi kwa watoto.
Akizungumzia kuhusu uzinduzi wa tovuti ambayo ni mahsusi kwa ajili ya mtandao wa wasindikaji wote wa chakula hasa unga na mafuta ya kula, Waziri Mkuu amesema mtandao huo una manufaa makubwa kwani pamoja na mambo mengine, unakusudiwa kutumika katika kutoa elimu na kuongeza ujuzi kutoka kwa wasindikaji wakubwa waliobobea kwenye teknolojia ya usindikaji chakula hapa nchini na kwingineko duniani.
