NA ASHRACK MIRAJI MWANGA.
WATU watano wamefariki Dunia na mmoja kujeruhiwa baada ya gari kuacha njia na kuwagonga watembea kwa miguu.
Akithibitisha kutokea kwa tukio hilo Kamanda wa Polisi mkoa wa Kilimanjaro, Simon Maigwa alisema kuwa, tukio hilo lilitokea Mei 12 mwaka huu majira ya saa moja usiku katika eneo la barabara kuu ya Mwanga – Same kijiji cha Lembeni wilayani Mwanga.
Kamanda Maigwa alisema, gari lenye namba za usajili T 736 AXN aina ya Mitsubishi Fuso ikitokea Lushoto kwenda Tarakea iliacha barabara na kuwagonga watembea kwa miguu sita ambao walikuwa abiria wa gari namba T 122 DGM aina ya Toyota Coaster ambalo lilikuwa limeharibika kando ya barabara ambapo abiria walikuwa nje ya gari wakisubiri matengenezo ya gari hilo.
Aliwataja waliofariki kuwa ni Cosmas Severine(27) mkazi wa Mbezi, Jackline Mushi(30) mkazi wa Moshi Karanga, Dorothea Massawe(36) mkazi wa Mbezi, Hiza Hamisi(27) mkazi wa Mwanga na Lucasia Otaru(49) mkazi wa Moshi.
Aidha alimtaja majeruhi kuwa ni Christiani Kiwango(32) mkazi wa Rombo ambaye alivunjika mkuu wa kushoto na amelazwa hospitali ya Rufaa ya KCMC.
