Wananchi wa Halmashauri ya Mji wa Geita,wamemshukuru Mwenyekiti wa umoja wa vijana wa Chama cha mapinduzi(UVCCM) Mkoa wa Geita ,Manjale Magambo kwa Kuwezesha wa Runinga (TV) ambazo zitawasaidia kufuatilia matukio mbalimbali zikiwemo shughuli za kimaendeleo zinazofanywa na serikali pamoja na kufuatilia Bunge la Bajeti ambalo linaendelea Jijini Dodoma.
Hatua hiyo ni mwendelezo wa Mwenyekiti wa UVCCM Mkoa wa Geita kuwezesha luninga kwenye vijiwe vinavyohusika kuuza kahawa ambapo kumekuwa na mkusanyiko wa wananchi wengi nia ikiwa ni wananchi kujenga utamaduni wa kufuatili habari mbalimbali na matukio yanayoendelea Nchini.
Baadhi ya wananchi ambao wamepatiwa luninga hizo kwenye Kata za Nyankumbu,Buhalahala na Kalangalala wameshukuru na kuelezea manufaa ambayo watayapata kutokana na kupatiwa luninga hizo.
“Kiukweli sisi tunaendelea kumuombea Mwenyekiti wa UVCCM kwa namna ambavyo ameendelea kuguswa na kutusaidia sisi wananchi ambao tunapenda kukaa kwenye vijiwe vya kahawa kwaajili ya kubadilishana mawazo kwa kutupatia TV kwani sasa hivi tutaona na kujua mambo mbalimbali yanayoendelea nchini likiwemo Bunge letu la Katiba ni viongozi wachache sana ambao wanaweza kujitoa na kusaidia jamii kama anavyofanya Manjale kwani sio tv tu hata misaada binafsi amekuwa akisaidia sana”Eliud Bariety Mwananchi wa mtaa wa Shilabela.
“Ninafuraha kubwa sana kijiwe change kukumbukwa sasa hivi naamini mauzo yanaweza kuongezeka watu watapata kahawa na tangawizi huku wakifuatilia matukio ya kitaifa ,lakini pia mimi simjui Manjale lakini kwa alichokifanya kwenye kijiwe change nitaendelea kumuombea Mungu ampe zaidi alipigusa na kutoa msaada huu”Bertha Mathayo Mama mjasiliamali.
Akikabidhi luninga hizo kwa niaba ya Mwenyekiti wa UVCCM Mkoa wa Geita,Mwenyekiti wa CCM Kata ya Buhalahala Mussa Kabese ,na Katibu wa CCM Kata ya Nyankumbu Joseph Kagemera wameelezea dhumuni na malengo ya kutolewa kwa tv hizo kwenye vijiwe vya Kahawa.
“Ndugu zangu Mwenyekiti wa UVCCM Mkoa wa Geita ametoa tv hizi ni kwasababu amekuwa akizunguka na kuona namna ambavyo mnapata shida kupitia luninga za zamani na sehemu zingine hakuna kabisa Tv hivyo nilimuomba aweze kuwezesha vijiwe vya Kahawa kwenye Kata yetu ya Buhala hala waweze kupata tv namshukuru maana alikubali na kutoa msaada huu ambapo sasa tutaona kazi kubwa inayofanywa na Rais wetu Samia Suluhu Hassan za kuleta maendeleo kwenye Nchi yetu”Mussa Kabese Mwenyekiti wa CCM Buhala hala.
Hadi sasa Mwenyekiti wa UVCCM ,ndugu Manjale Magambo ameshawezesha vijiwe sita kupata luninga za kisasa ikiwa ni mwendelezo wa kuhakikisha vijiwe vingi vya kahawa vinapatiwa huduma hiyo ya kupata habari na matukio mbalimbali.
