SERIKALI YATOA NG’OMBE WA MAZIWA KWA WANUFAIKA WA TASAF BADALA YA FEDHA.

Wanufaika wa Mpango wa Kunusuru kaya masikini TASAF kutoka kata ya Lubonde wilayani Ludewa mkoani Njombe wamepewa mradi wa Ng’ombe 13 wa maziwa badala fedha taslimu baada ya kuona wanufaika wengi wanatumia fedha hizo kinyume cha kusudio la serikali ikiwa ni pamoja na ulevi hatua ambayo inaongeza umasikini katika kaya na utegemezi kwa taifa

Samweli Nziku ambaye ni afisa mifugo na Erick Kapinga mtaalamu wa kilimo kata wamesema serikali imeamua kutoa mradi wa Ng’ombe wa maziwa kwa wanufaika wa TASAF kata ya Lubonde baada ya diwani kuomba kuwapa mifugo badala ya fedha wanufaika kwakuwa wengi wao siku wanayopewa fedha hizo hulala nje na wengine kushinda vilabuni kunywa pombe na kisha kurejea nyumbani hadi pale tu pesa itakapoisha

Kata ya Lubonde ina wanufaika 12 wa mfuko wa kunusuru kaya masikini hivyo serikali imetoa Majike 12 na dume moja ambalo litatumika na wote huku pia akisema majukumu mengine waliyokabidhiwa ni kutoa elimu na matibabu kwa mifugo.

Kwa upande wa wanufaika akiwemo Ester Mtewele kutoka kijiji cha Mkiu wanaishukuru serikali kuja na mradi mbadala wa kuzikwamua kaya masikini kwasababu kundi kubwa la wanufaika huwa wanatumia fedha wanazopewa kinyume dhamira ya serikali.

Nae diwani wa kata ya Lubonde Edger Mtitu akieleza sababu ya kuomba serikali kuwapa wanufaika wa TASAF kutoka katani kwake mifugo badala ya fedha ,amesema ni kutokana na matumizi mabaya ya fedha zinazotolewa kupitia mpango huo na kisha kudai kwamba endapo mradi huo utafanikiwa vyema uchumi utakuwa.

Mtitu amesema mbali na kuwainua kiuchumi lakini pia mradi wa Ng’ombe wa maziwa utasaidia kukabiliana na tatizo la udumavu na utapiamlo linalosababishwa na kutozingatia mlo.

“Niwatake wananchi wote mliopatiwa msaada wa ng’ombe wa maziwa kuwatunza vizuri kwasababu watakapoanza kutoa maziwa itasaidia kukabiliana na udumavu,alisema Edger Mtitu”

Ukiachana na Kata ya Lubonde Kupewa Mradi wa Ng’ombe na Serikali lakini pia shule nyingi kongwe za msingi za kata hiyo zilikuwa na changamoto kubwa ya vyoo ambapo tayari zimepatiwa fedha na kujenga vyoo vya kisasa ili kutoka kwenye matumizi ya vyoo vya makuti.