Na Mwandishi Wetu, Dar es Salaam
Kikundi cha Kilimo endelevu na jumuishi cha SAGCOT (GRG) kimewakutanisha wadau wake kujadili changamoto na kuainisha fursa zitakazo msaidia mkulima kufanya kilimo chenye tija kinachozingatia uhifadhi wa mazingira katika kongani ya Kilombero.
Akizungumza kwenye kikao cha mwaka kilicho wakutanisha wadau kutoka serikalini, Sekta binafsi, asasi za kiraia, taasisi za kifedha na watafiti mbalimbali jijini Dar es Salaam mwishoni mwa, Naibu Katibu Mkuu (Muungano) Ofisi ya Makamu wa Rais, Bw. Abdallah Mitawi alisema lengo la kikao hiko ni kutathmini na kupitia maazimio ya kikao kilichopita na kuja na maboresho yatakayosaidia sekta hiyo kuleta tija kwa mkulima na kuchangia katika pato la taifa.
“ Wakati Dunia ikikabiliwa na mgogoro wa mabadiliko ya tabia ya nchi na kusabisha uwepo wa mvua wastani hivyo kuna kila sababu ya kuangalia namna bora yaufanyaji kilimo ambacho ni rafiki wa mazingira na tumekutana kukumbushana wajibu wetu tukiwa kama viongozi katika kuhakikisha kilimo kinakuwa rafiki kwa mazingira,*alisema Bw. Mitawi.
Alisema kilimo kinachangia kati ya asilimia 10 hadi 14 ya hewa ukaa inayosababisha mabadiliko ya tabia nchi, na wanaoathirika zaidi na athari za mabadiliko hayo ni
wakulima ambao hutegemea kilimo kwa asilimia 100 hivyo kunakila sababu ya maafisa kilimo kwa kushirikiana na wadau kuhakikisha wakulima wanapata elimu sahihi za kufanya kilimo biashara kinachozingatia uhifadhi wa mazingira nafaida.
Kwa upande wake Mkuu wa Wilaya ya Gairo, Bw. Jabiri Makame alisema katika wilaya yake zaidi ya asilimia 95 ya wananchi wanajiusisha na kilimo hivyo kunakila sababu ya kuhakikisha kilimo kinachofanywa kinatunza na kuhifadhi mazingira sambamba na kuzingatia kanuni za biashara endelevu.
“Katika kusukuma ajenda ya kuendeleza Sekta ya Kilimo, Mifugo na Uvuvi kwa kuzingatia uhifadhi na utunzaji wa mazingira, tumekuwa tukifanya kazi kwa karibu na wadau wakiwemo SAGCOT ambao wamekuwa wakifanya kazi kubwa kutuweka pamoja wadau kujadiliana changamoto na kuibua fursa zinazochagiza ukuwaji wa pato la taifa sambamba na kuleta mageuzi makubwa kwenye sekta hizo,” alisema Bw. Makame.
Naye Meneja wa SAGCOT Kongani ya Kilombero, Bw. John Banga alisema jukwaa hilo linalosimamiwa na Ofisi ya Makamu wa Rais linafanya kazi kama chombo cha ushauri kwa SAGCOT katika ngazi za taifa na kongani likingilenga kuratibu na kufuatilia masuala ya kimazingira katika programu zilizoko kwenye Ubia.
“Miongoni mwa vipaumbele vyetu vilivyotokana na kusaini randama ya makubaliano viliangazia ufugaji wa kisasa , kuainisha mazao ya kipaumbele ambayo yatatoa fursa za uchumi kwa wakulima hasa wananchi wa mkoa wa Morogoro sambamba na utunzaji na uhifadhi wa mazingira, *alisema Bw. Banga .
Alisema Serikali ya Awamu ya Sita chini ya Rais Dkt. Samia Suluhu Hassan imejipambanua zaidi katika kuhakikisha vijana wanakuwa muhimili wa kukuza uchumi kwa kuzalisha kwa tija.
” Azma ya Serikali inaonekana wazi kupitia programu za mafunzo atamizi, maarufu kama Building a Better Tommorow (BBT) kwa upande wa sekta ya Kilimo na BBT- LIFE kwa upande wa sekta ya Mifugo, hivyo kupitia programu hizo zitakenda kuchochea na kuibua ubunifu kwa vijana kushiriki katika kilimo na ufugaji wenye tija pamoja na kuwainua kiuchumi,” alisema Bw. Banga.
