THE DESK & CHAIR FOUNDATION YAJITOSA KUTATUA KERO YA MADAWATI,YAPELEKA 170 ILEMELA

Mwenyekiti wa The Desk & Chair Foundation, Alhaji Dk. Sibtain Meghjee, leo akitoa taarifa kabla ya kukabidhi msaada wa madawati 170 na miche ya miti 1,800 wenye thamani ya sh. milioni 23 ili kutatua kero ya madawati wilayania Ilemela.

Katibu Tawala wa Wilaya ya Ilemela, Mariamu Msengi akipokea taarifa na nyaraka za makabidhiano ya madawati 170 na miche ya miti 1800 kutoka kwa Mwenyekiti wa The Desk & Chair Foundation,Alhaji Dk.Sibtain Meghjee leo.

Mwenyekiti wa The Desk & Chair Foundation, Alhaji Dk.Sibtain Meghjee (kulia) akimkabidhi miche ya miti 1800 na madawati 170, Katibu Tawala wa Ilemela,Mariamu Msengi (kushoto) ili kutatua changamoto ya wanafunzi kukaa juu ya sakafu katika shule za msingi wilayani humo leo.

Katibu Tawala wa Ilemela Mariamu Msengi (kushoto), leo akimkabidhi Diwani wa Ibungilo (CCM) na Mwenyekiti wa Kamati ya Huduma za Jamii,Manispaa ya Ilemela,Hussein Magera,miche ya miti na madawati kwa ajili ya shule za msingi za manispaa hiyo huku akishuhudiwa na Mwenyekiti wa The Desk & Chair Foundation, Alhji Dk. Sibtain Meghjee.

Kaimu Mkurugenzi wa Manispaa ya Ilemela, Marco Isaack (kushoto),leo akipokea madawati na miche kutok kwa Mwenyekiti wa Kamati ya Huduma za Jamii wa Manispaa hiyo, Hussein Magera.

Diwani wa Kitangiri (CCM) Donald Ndaro akizungumza kwa niaba ya madiwani wa kata ambazo shule zao zimenuifaka kwa msaada wa madawati 170 na miche ya miti 1,800.

Caren Paschal, leo akiishukuru The Desk & Chair Foundation, niaba ya wanafunzi wenzake kuhusiana na msaada wa madawati na miche ya miti iliyotolewa na tasisi hiyo.

Wanafunzi wakiwa katika picha ya pamoja na mfadhili na Mwenyekiti wa The Desk & Chair Foundation, Alhaji Sibtain Meghjee, wa kwanza kushoto (waliokaa mbele),wa nne kutoka kulia ni Katibu Tawala wa Ilemela, Mariamu Msengi akifutiwa na Kaimu Mkurugenzi wa manispaa hiyo, Marco Isaack na wa pili kushoto ni Donald Ndaro, Diwani wa Kitangiri.

Walimu wa shule zilizonufaika na msaada wa madawati wakiwa katika picha ya pamoja na Mwenyekiti wa The Desk & Chair Foundation, Alhaji Dk.Sibtain Meghjee (wa kwanza kushoto) walioketi mbele,Katibu Tawala wa Ilemela Mariamu Msengi (wa nne kutoka kulia) leo.Picha zote na Baltazar Mashaka

NA BALTAZAR MASHAKA,ILEMELA

SERIKALI imeipongeza Taasisi ya The Desk & Chair Foundation,Tawi la Tanzania kwa kuunga mkono jitihada za Rais Dk.Samia Suluhu Hassan,katika kutatua changamoto za elimu wilayani Ilemela.

Pongezi hizo zimetolewa leo na Katibu Tawala wa Wilaya ya Ilemela,Mariam Msengi kwa niaba ya Mkuu wa Wilaya hiyo,Hassan Masala,wakati akipokea madawati 170 na miche 1,800 ya mbao,matunda na vivuli yaliyotolewa na taasisi hiyo kwa shule za msingi Songambele,Kitangiri C, Bwiru,Isanzu,Amani,Nyamilekelwa na Kayenze.

Amesema serikali inayoongozwa na Rais Dk.Samia imeweka mkazo kuendeleza sekta ya elimu kwa kujenga miundombinu ya shule,hivyo inaishukuru The Desk & Chair Foundation kwa kuguswa na kuwa mstari wa mbele kuipunguzia serikali changamoto katika sekta ya elimu ambapo madawati hayo kila moja litakaliwa na watoto watatu.

“Ni jambo la kuenziwa kwani baadhi ya shule watoto wanakaa chini juu ya sakafu,serikali ikipata fedha itaendelea kutatua changamoto hiyo na rai yangu ka wanafunzi wa shule chache zilizonufaika na madawati haya mkayatunze ili wenzenu watakaokuja wayatumie,”amesema Msengi.

Naye Mwenyekiti wa taasisi hiyo,Alhaji Dk.Sibtain Meghjee amesema wanatekeleza miradi 45 maeneo mbalimbali ukiwemo wa ukarabati wa madawati wilayani Ukerewe na hivyo madawati hayo yatapunguza adha ya watoto kukaa chini madarasani katika shule za msingi.

“Sh. milioni 23 zimeramia madawati 170 haya na miche 1,800 ambazo zimetolewa na watalii vijana wanaosoma vyuo vikuu nchini Marekani mmoja akiwa mzaliwa wa Mwanza,waliomba waache athari chanya baada ya kutalii na walichagua kutoa madawati na visima sita vya maji,”amesema.

Alhaji Dk.Meghjee amesema kwa miradi inayotumia mbao hupanda miti kufidia na kutunza mazingira ambapo miche 10 ni kwa dawati moja na kuzitaka shule zilizonufaika kupanda na kutunza miti hiyo hadi kuvunwa yakiwemo madawati hayo yaliyotengezwa kwa viwango vya ubora wa juu yasawasaidie muda mrefu.

Amesema msaada huo mbali na watalii wengine walioshiriki kufadhili ni Aiden na Zara Ramji,Travon Muhhamad,Well Wishers na familia ya Tellis Foundation ambao ana uhakika wataendelea kusaidia kutatua changamoto za elimu zikiwemo za kijamii.

Aidha kwa niaba ya wanafunzi John Daniel ameishukuru serikali kutoa elimu bure na The Desk & Chair kwa msaada wa madawati ambao utawapunguzia adha ya kukaa chini iliyosababisha baadhi kuandika hati mbaya huku Caren Pacshal akisema utaongeza ufaulu na kukuza taaluma.

Mwenyekiti wa Kamati ya Huduma Manispaa ya Ilemela, Hussein Magera,amesema msaada wa madawati hayo 170 umeandika historia ya kupunguza sehemu kubwa ya kero ya madawati yanayohitajika,yataongeza ufanisi kwa wanafunzi kujifunza na walimu kufundishia.

Akizungumza kwa niaba ya madiwani wa kata za shule saba zilizonufaika,Diwani wa Kitangiri (CCM) Donald Ndaro amesema atakuwa mwizi na mtovu wa fadhila asipowashukuru The Desk & Chair Foundation kuwapunguzia aibu ya kukosa madawati pia kuwapa nafuu ya bajeti ya kuhudumia jamii.

“Nimewaona mkitoa misaada ya kijamii maeneo mbalimbali mkiunga mkono jitihada za Rais Samia za kumrua mama ndoo kichwani na kufanya kazi ya hamasa kwa watu wa nje.Ni akili ya ziada kutoa madawati na miche ya miti ili kurejesha uoto wa asili na mazingira,”amesema.

Kaimu Mkurugenzi Mtendaji wa Manispaa ya Ilemela,Marco Isack,ameeleza upungufu wa madawati ni 3,629 kati ya 26,444 ya mahitaji ya shule 83 za msingi,hivyo kupata hayo 170 bado wanahitaji 3,459 ambayo watayapunguza kwa fedha za mapato ya ndani kukidhi mahitaji ya shule hizo.

“The Desk & Chair Foundation kwa hili mlilofanya si jambo la rahisi,ni wachache wenye moyo wa kufanya hivi kama si moyo ya upendo wa Mungu pia,miti tuliyopewa tusipoitunza hatuwezi kupata madawati,hivyo twendeni tukailee ituletee manufaa baadaye,”amesema.