CHAMA Cha Mapinduzi (CCM),kimesema kinaridhishwa na kasi ya serikali ya awamu ya sita katika utekelezaji wa maendeleo na kwamba uzinduzi wa Ikulu mpya ya Chamwino ni utekelezajiwa wa Ilani ya Uchaguzi ya Chama hicho 2020/2025.
Kupitia Ilani hiyo,CCM pamoja na mambo mengine imeahidi kuendelea kuhakikisha kwamba Makao Makuu yanaboreshwa zaidi ikiwa ni pamoja na kukamilika miundombinu ya barabara,majengo ya ofisi na nyumba za makazi kwenye eneo la Ikulu Chamwino Dodoma.
Akizungumza katika mahojiano maalum na Uhuru FM,Mei 19,2023,Jijini Dodoma,Katibu wa NEC,Itikadi na Uenezi Sophia Mjema amesema wanajisikia fahari wakiona kazi nzuri inayofanywa na Rais Samia Suluhu Hassan.
Amempongeza Rais Dkt Samia kwa kuwa na maono ya mbali zaidi katika kuhakikisha mipango mbalimbali iliyoanzishwa na watangulizi wake anaitekeleza kwa vitendo na hakuna mradi ulioachwa na yote itakamilika kwa kuwa ni sehemu ya utekelezaji wa ilani ya uchaguzi ya CCM ya mwaka 2020-2025.
