*******************************
Na John Walter-Manyara
Jeshi la polisi Mkoani Manyara katika operesheni zake limefanikiwa kukamata madawa ya kulevya aina mbalimbali na watuhumiwa.
Mafanikio hayo yamepatikana baada ya kufanya doria katika mji wa Babati na viunga vyake, Kijiji cha Kagera,Kata ya Kisangaji,Kijiji cha Gichameda,Sangaiwe,Maneo ya kata ya Mutuka, Kijiji cha Nangwa wilaya ya Hanang’, Kijiji cha Kaloleni wilaya ya Kiteto na geti la kuingilia kwenye Machimbo ya Tanzanite wilaya ya Simanjiro.
Kamanda wa polisi Mkoani Manyara Paul Kasabago, amesema kuwa kwa doria hiyo wamefanikiwa kukamata mitambo ya kutengenezea pombe kali ya moshi (gongo) bangi misokoto 145, mirungi gramu 200 na kiasi cha lita 87 za pombe haramu(gongo).
Kamanda Kasabago ameongeza kuwa jumla ya watuhumiwa 18 wa makosa mbalimbali walikamatwa na upelelezi ukikamilika watafikishwa mahamani kujibu tuhuma zinazowakabili.
Aidha amewasisitiza wananchi kuwa biashara haramu hazina nafasi tena mkoani Manyara kwa kuwa wamejipanga kuhakikisha wanapambana na wafanyabiashara haramu na kuwa manyara sio kichochoro cha kupitisha au kufanyia biashara haramu.
