Home Mchanganyiko SERIKALI YASHINDA KESI DHIDI YA ASASI ISIYO YA KISERIKALI YA CHANGE TANZANIA...

SERIKALI YASHINDA KESI DHIDI YA ASASI ISIYO YA KISERIKALI YA CHANGE TANZANIA LIMITED

0

Asasi isiyo ya kiserikali ya Change Tanzania Limited ambayo mmiliki wake ni Bi. Maria Sarungi Tsehai imeshindwa kwa mara nyingine kesi iliyoifungua dhidi ya Msajili wa Makampuni. Katika kesi hiyo, ambayo uamuzi wake umetolewa tarehe 20 Mei, 2020, Mahakama Kuu ya Tanzania imeona kuwa hoja zilizowasilishwa Mahakamani hapo hazina msingi hivyo kuifuta kesi hiyo na kuitaka Asasi hiyo kulipa gharama zote za Serikali. 

  1. KIINI CHA SHAURI 

Asasi ya Change Tanzania ilifungua shauri tajwa Namba. 27 la mwaka 2019 katika Mahakama Kuu (Kitengo cha Biashara) ambapo pamoja na mambo mengine, ilikuwa ikipinga Marekebisho katika Sheria ya Makampuni Sura ya 212. 

Marekebisho katika Sheria ya Makampuni Sura ya 212 yalihusu pamoja na mambo mengine kuweka tafsiri mpya ya maneno “Kampuni” na “Asasi” katika Sheria husika na pia kuzitaka Asasi zote zilizosajiliwa chini ya Sheria ya Makampuni ambazo hazikuwa na malengo ya kibiashara kujisajili chini ya Sheria husika na iwapo zingeshindwa kufanya hivyo ndani ya muda wa miezi miwili zingehesabika kuwa zimefutiwa usajili wake. 

Asasi ya Change Tanzania ilitaka Mahakama itoe Amri ya kukubalika kwa ombi la kubadili Katiba yake ili iweze kuendelea kutambulika kama Asasi iliyosajiliwa chini ya Sheria ya Makampuni baada ya kubadilishwa kwa Sheria husika kwa lengo la kutaka Asasi zote zisizo na malengo ya kibiashara zisisajiliwe chini ya Sheria ya Makampuni na badala yake zikajiandikishe chini ya Sheria yenye kukidhi malengo ya Asasi hizo. 

Change Tanzania ilitaka pia Mahakama itoe Amri ya kumtaka Msajili wa Mahakampuni kupokea na kuidhinisha marekebisho ya Katiba ya Taasisi hiyo ambayo walidai kuwa yamekwishafanyika na kuwasilishwa kwa Msajili wa Makampuni na kulipiwa. 

  1. UTETEZI WA SERIKALI 

Katika utetezi wake, Serikali kupitia Ofisi ya Wakili Mkuu wa Serikali iliwasilisha hoja tano (5) za kisheria kupinga maombi hayo kwa msingi kwamba maombi hayo yamepitwa na muda kwa kuwa Sheria iliyokuwa ikibishaniwa ilishaanza kutekelezwa na katika Shauri hilo, Asasi ya Change Tanzania haikuwa na msingi wowote kisheria wa kumshtaki Msajili wa Makampuni. Pia, Serikali ilipinga madai hayo kutokana na Asasi hiyo kufungua Shauri dhidi ya Msajili wa Wakala wa Usajili na Leseni (BRELA) ambaye hayupo kisheria badala ya Msajili wa Makampuni. 

  1. UAMUZI WA MAHAKAMA 

Baada ya kusikiliza pande zote mbili, mnamo tarehe 20 Mei, 2020, Mahakama Kuu ya Tanzania (Kitengo cha Biashara iliafikiana na hoja za Serikali na kuitupilia mbali kesi hiyo kwa kukosa hoja za msingi kisheria. 

Mahakama imeamuru pia Asasi ya Change Tanzania kulipa gharama zote za Serikali kutokana na shauri hilo lisilo na msingi. 

Hii ni kesi ya pili kwa Asasi ya Change Tanzania kushindwa. Mnamo tarehe 14 Mei, 2020, Mahakama Kuu ya Tanzania ilitupilia mbali kesi ya Kikatiba Namba. 21 ya mwaka 2019. iliyofunguliwa tarehe 29 Agosti, 2019 na Asasi za Centre for Strategic Litigation ambayo mmoja wa wamiliki wake ni Wakili wa Kujitegemea Bw. Jebra Kambole na Change Tanzania Limited. Kesi hiyo ilifunguliwa kupinga Marekebisho katika Sheria ya Makampuni Sura ya 212, Sheria ya Asasi Zisizo za Kiserikali Sura ya 337 na Sheria ya Miunganisho ya Wadhamini Sura ya 318.