*************************
NA EMMANUEL MBATILO
Kikosi cha Timu ya Pyramids kutoka Misri kimewasili salama jijini Mwanza tayari kwa mchezo wao dhidi ya Yanga utakaochezwa kwenye Uwanja wa CCM Kirumba jijini humo.
Kocha wa Yanga SC, Mwinyi Zahera amesema kikosi chake kipo tayari kwa mapambano na amefanyia kazi matatizo kadhaa yaliyomo ikiwemo umaliziaji.
Zahera amesema ameandaa kikosi cha kufanya vizuri dhidi ya Pyramids lakini ana uhakika wa kutumia vizuri mchezo huo wa nyumbani.
Akizungumza kwenye uwanja wa ndege wa Mwanza mara baada ya kuwasili, kocha wa timu hiyo Sebastian Desabre amesema anafahamu ubora kikosi cha Yanga hivyo wamefanya maandalizi ya kutosha kuhakikisha wanarejea kwao na alama tatu kibindoni.
Desabre raia wa Ufaransa amesema kikosi chake kipo tayari kwa mchezo dhidi ya Yanga SC Jumapili hii.
Aidha,Desabre amesema wapinzani wao ni timu bora hivyo anaamini utakuwa mchezo mzuri na wenye upinzani kesho kwenye Uwanja wa CCM Kirumba jijini Mwanza.
Makocha hao wote wa pande zote mbili wamezungumza katika mkutano na waandishi wa habari asubuhi hii jijini Mwanza.
.
