Mwenyekiti wa usalama Barabarani, Salim Abri akizungumza wakati wa uzinduzi ofisi ya madereva daladala.
Mwenyekiti wa usalama Barabarani mkoa wa Iringa, Salim Abri akiwa katika picha ya pamoja na madereva daladala wa manispaa ya Iringa
**************
NA DENIS MLOWE, IRINGA
MWENYEKITI wa kamati ya Usalama Barabarani mkoa wa Iringa, Salim Abri, amewataka madereva daladala kuzingatia sheria za usalama pindi wanapokuwa wakiendesha daladala zao.
Akizungumza wakati wa uzinduzi wa ofisi mpya ya madereva wa daladala manispaa ya Iringa, Abri alisema kuwa ifike wakati madereva wafate sheria kuepukana na usumbufu wa vyombo vya usalama.
Alisema kuwa imekuwa kawaida ya madereva wa daladala kuvunja sheria kisha kuanza malalamiko kwamba wanaonewa na polisi wa usalama Barabarani hali ambayo imesababishwa na madereva kutofata sheria.
Abri ambaye pia ni mkurugenzi wa kampuni ya usafirishaji ya Asas alisema kuwa kuna baadhi ya madereva wanaokiuka taratibu za ushafirishaji ikiwemo kutofika mwisho wa vituo hali inayoleta usumbufu kwa abiria.
Alisema madereva wanapaswa kufata sheria ikiwemo kutoa tiketi kwa abiria lakini pia kuepuka kuwanyanyasa abiria kwa kutotumia lugha mbaya kwa abiria ambao wamewapakia.
Aliongeza kuwa licha ya kufata sheria madereva wametakiwa kuondokana na migomo isiyokuwa na maana kwa lengo la kufikisha kilio chao katika mamlaka husika kwani kugoma sio njia ya kutatua tatizo.
“Hivi unavyogoma mnajua kwamba wengine wanafurahia Sana hali hiyo? Kumbukeni kuna njia nyingi za kufikisha ujumbe kwa serikali endapo mnaona mambo hayapo sawa hivyo acheni tabia ya kugoma” Alisema
Katika uzinduzi huo Abri aliwachangia sh. Milioni kumi kwa ajili ya kufungua Saccos ya madereva daladala na kuwataka kutumia vyema Saccos hiyo katika kukuza uchumi.
Aliwataka pia kuacha tabia ya kushabikia mambo ya siasa zisizo na faida kwao ambazo haziwezi leta maendeleo kisa unafata mkumbo kutoka kwa watu wengine.
Alisema kuwa wanatakiwa kuangalia viongozi ambao wapo kwa ajili ya kuwaletea maendeleo ambayo wanayataka na kukiamini chama cha Mapinduzi chenye nia haswa ya kuwaletea maendeleo wananchi wake.
Kwa upande wao madereva wa daladala kupitia katibu wao, Rashid Ayubu waliomba mafunzo ya Mara kwa Mara ikiwezekana kila baada ya miezi Sita kutokana na mabadiliko ya sheria ya mara kwa mara.
Ayubu alisema kuwa umoja huo Una mpango wa kupata gari aina ya Kosta kwa lengo la kuwaongezea kipato lenye thamani ya sh. Milioni 56 na kufungua Saccos ya umoja huo.
Aidha alisema kuwa changamoto kubwa wanayokumbana nayo ni baadhi ya barabara zimekuwa chakavu na zinahitajika matengenezo makubwa na nyingine kushindwa kuendelea na safari kutokana na kuvamiwa na bajaji na bodaboda.
