NA DENIS MLOWE IRINGA
AFISA Tarafa wa Malangali, Juma J. Mapesah Makala, amesisitiza umuhimu wa kuendelea kuunga mkono juhudi za uwekezaji katika Tarafa hiyo, akieleza kuwa ushirikiano kati ya viongozi, watumishi wa umma na wananchi ni nguzo muhimu katika kuharakisha maendeleo ya kiuchumi na kijamii.
Makala ametoa wito huo akisisitiza umuhimu wa kutangaza na kuunga mkono Jukwaa la Uwekezaji la Wilaya ya Mufindi (Mufindi Investment Forum), ambalo linaratibiwa na Mkuu wa Wilaya hiyo, Dkt. Linda, kwa lengo la kuhamasisha uwekezaji na kufungua fursa zaidi za maendeleo katika maeneo mbalimbali ya wilaya hiyo.
Amesema juhudi hizo zinaendana na dhamira ya Serikali ya Awamu ya Sita ya kuimarisha uchumi kupitia uwekezaji, kuongeza fursa za ajira na kuboresha maisha ya wananchi, huku akisisitiza umuhimu wa viongozi na watumishi wa umma kushiriki kikamilifu katika kufanikisha malengo ya maendeleo ya taifa.
Katika hatua nyingine, Makala amewapongeza Mbunge wa Mufindi Kusini, Kihenzile, pamoja na Mbunge wa Mafinga Mjini, Dickson Lutevele, kwa ushirikiano wanaouonesha na watumishi wa Tarafa ya Malangali katika kutekeleza majukumu yao ya kuwahudumia wananchi.
Amesema ushirikiano huo ni muhimu katika kutatua changamoto zinazowakabili wananchi na kuhakikisha kuwa masuala ya msingi yanayohusu maendeleo ya maeneo yao yanapatiwa kipaumbele.
Aidha, amewapongeza madiwani wa Tarafa ya Malangali kwa namna wanavyotekeleza majukumu yao ya kuwawakilisha wananchi na kuwasilisha changamoto zao katika vikao vya mabaraza ya madiwani ya halmashauri husika.
Amesema uwakilishi wenye tija katika mabaraza hayo ni muhimu katika kuhakikisha kuwa kero za wananchi zinajadiliwa na kutafutiwa ufumbuzi, huku akiwataka viongozi hao kuendelea kushirikiana na wananchi ili kuimarisha utoaji wa huduma na kuharakisha utekelezaji wa shughuli za maendeleo.
Makala pia ametoa pongezi kwa watumishi wa umma katika Tarafa ya Malangali, akitambua mchango wao katika kuwahudumia wananchi na kutekeleza majukumu yao ya kila siku.
Amesema jitihada zinazofanywa na watumishi hao zina mchango mkubwa katika kuboresha huduma kwa jamii na kuimarisha utekelezaji wa shughuli za serikali katika maeneo yao ya kazi.
“Niwapongeze sana watumishi wa umma wa Tarafa ya Malangali. Jitihada zenu katika kuwahudumia Watanzania zinaonekana. Endeleeni kufanya kazi kwa weledi, uadilifu na kujituma ili kuhakikisha wananchi wanapata huduma bora,” amesisitiza.
Tarafa ya Malangali, inayotajwa pia kama eneo la maziwa na asali, inaendelea kuhitaji ushirikiano wa viongozi na wananchi katika kutambua na kutumia fursa zilizopo, zikiwemo za uwekezaji, ili kuchochea shughuli za kiuchumi na kuboresha ustawi wa jamii.
Makala amesisitiza kuwa kuendeleza mshikamano kati ya viongozi wa kisiasa, watumishi wa umma na wananchi ni hatua muhimu katika kuhakikisha kuwa juhudi za kuleta maendeleo zinakuwa na matokeo chanya na endelevu kwa wakazi wa Tarafa ya Malangali na Wilaya ya Mufindi kwa ujumla.
