Halmshauri ya Manispaa ya Ilala imesema kuwa ifikapo Julai Mosi mwaka huu itaanza kuwachukulia hatua za kisheria wafanyabiashara wote watakaobainika kufanya biashara bila ya leseni za biashara.
Aidha, imebainisha kuwa katika kipindi cha Julai hadi Mei 2018 kukusanya Sh bilioni 52 sawa na asilimia 92 ya makusanyo hayo huku lengo lilikuwa kukusanya Sh bilioni 56.
Hayo yamesemwa leo jijini Dar es Salaam na Mkurugenzi wa Manispaa hiyo, Jumanne Shauri wakati akitoa taarifa kwa wanahabari kuhusu mikakati ya ukusanyaji mapato na utekelezaji wa miradi.
Amesema kuwa katika kipindi cha siku 13 manispaa hiyo itafanya oparesheni ya kuwakagua na kuwapa elimu wafanyabiashara juu ya leseni hizo na kwamba baada siku hizo kumalizika mkono wa sheria utawagusa watakaobainiki kukaidi kukata na kulipia leseni zan biashara.
“ Kuanzia leo tunafanya oparesheni na kuwakagua wafanyabaishara na kutoa elimu kama alivyosema Rais John Pombe Magufuli hatutafunga biashara ya mtu ila watakaoidi sheria zitachukuliwa dhidi yao,” amesema Shauri.
Amebainisha kuwa katika eneo la Kariakoo limebainika kuwa na wafanyabiashara wengi wasio na leseni za biashara ambapo kati ya 13125 ni wafanyabiashara 8671 waliokata leseni huku akisisitiza Kata ya Jangwani wafanyabiashara 655 pekee walio na leseni kati ya 955.
Amesisitiza katika eneo la ushuru wa leseni walitakiwa kukusanya Sh bilioni 8 lakini wamekusanya Sh bilioni 5 na kwamba ndani ya siku hizo wanalenga kukusanya Sh bilioni 2.8.
Amefafanua kuwa eneo lingine linalonekana kuwa na makusanyo madogo ni Nyumba za kulala wageni, ujenzi wa majengo ambapo walijiwekea malengo ya kukusanya Sh bilioni 2 ila hadi sasa wamepata Sh milioni 400 pamoja na ushuru wa kuzingira majengo makubwa.
Shauri amesema katika kuhakikisha ndani ya siku hizo wafanyabiashara wanalipia leseni hizo wanaanngalia uwezekano wa kufanya hadi siku za wikiendi na kwamba malipo hayo yatafanyikia katika benki zitakazoelekezwa.
Pia amesema wafanyabiashara watakaokiuka agizo hilo watatakiwa kulipa faini ya kuanzia Sh 100,000 hadi Sh 1000,000.
Wakati huo huo, Katika hatua nyingine, halmashauri hiyo imesema imetekeleza miradi mbalimbali ikiwemo Ujenzi wa Shule Mpya za Msingi ikiwemo ya Kipunguni Chini na Ulongoni na Sekondari ya Kinyerezi Annex, Buguruni, na Ukonga Jeshini pamoja na ujenzi wa madawati ya wanafunzi.
Shauri amesema kuwa tayari mkataba wa utekelezaji wa Mradi wa Ujenzi wa Machinjio ya Kisasa ya Vingunguti umeshasainiwa na ujenzi unaendelea.
Wakati huo huo, Mkurugenzi wa manispaa hiyo amesema Juni 24 mwaka huu watatoa Sh bilioni 2 kwa ajili ya mikopo Wakinamama, vijana na walemavu ambapo gari mbili aina ya Coaster zitatolewa, Bajaji 50 pamoja na Pikipiki 30.
