Mkuu wa Wilaya ya Bunda, Dkt. Vicent Naano, ambaye pia ni Kaimu Mkuu wa Wilaya ya Serengeti, amewataka watendaji wa Halmashauri ya Serengeti kutumia mafunzo ya Uraia na Utawala Bora ili kupunguza, au kumaliza kabisa, migogoro inayowakabili wananchi.
Dkt. Naano alitoa kauli hiyo wakati akizungumza na watumishi wa Halmashauri ya Wilaya ya Serengeti alipokuwa akifungua mafunzo hayo yanayotolewa na Wizara ya Katiba na Sheria kwa halmashauri zote mkoani Mara.
Alisema kuwa baadhi ya viongozi wamekuwa wakisitasita kuwahudumia wananchi, hali inayosababisha kuongezeka kwa migogoro miongoni mwao. Alisisitiza umuhimu wa kutumia mafunzo hayo kuimarisha ufanisi wa utendaji kazi na kutatua changamoto za wananchi kwa haraka na ufanisi.
Kwa upande wake, Mratibu wa mafunzo hayo kutoka Wizara ya Katiba na Sheria, ambaye pia ni Wakili Mkuu wa Serikali, Joyce Mushi, alisema mafunzo hayo yanatarajiwa kuleta tija kwa watendaji wa ngazi ya kata kwa kuboresha Utawala Bora katika maeneo yao. Aliongeza kuwa Wizara ina matumaini makubwa kuwa elimu inayotolewa itasaidia kuimarisha ustawi wa wananchi kupitia utatuzi wa migogoro na usimamizi bora wa rasilimali.
Mafunzo hayo ni sehemu ya juhudi za serikali kuimarisha uwajibikaji na ufanisi wa utendaji wa viongozi wa umma.
