Dar es Salaam, Septemba 28,2024.
Katika kujiandaa na maadhimisho ya Siku ya Moyo Duniani, Hospitali ya Aga Khan, Dar es Salaam kwa kushirikiana na Taasisi ya Moyo ya Tanzania (TCS), imeandaa tukio maalum leo ili kuongeza uelewa kuhusu afya ya moyo na kuhamasisha jamii kuhusu umuhimu wa kutunza afya ya mioyo yao. Siku ya Moyo Duniani hufanyika kila mwaka tarehe 29 Septemba, ikilenga kuongeza ufahamu kuhusu magonjwa ya moyo na njia za kuyazuia.
Tukio hili lilijumuisha mazoezi ya aerobic, uchunguzi wa bure wa viashiria muhimu vya afya kama shinikizo la damu na sukari, pamoja na majadiliano ya kina yaliyoongozwa na madaktari bingwa wa moyo na wauguzi kutoka kitengo cha matibabu ya moyo cha Hospitali ya Aga Khan. Pia, washiriki walipata fursa ya kufanyiwa vipimo vya ziada kama ECG na ECHO kwa punguzo la asilimia 50.
Murtaza Mukhtar, Mkuu wa Operesheni za Matibabu wa Hospitali ya Aga Khan, alisema, “Katika maadhimisho haya ya Siku ya Moyo Duniani, tunawahimiza watu wote kujitahidi kutunza afya ya mioyo yao. Moyo wenye afya ni msingi wa maisha bora, na kutunza afya ya moyo ni muhimu kwa ustawi wa mwili, akili, na hisia. Kwa kushirikiana, tunaweza kuchukua hatua za kuboresha afya zetu za moyo na maisha kwa ujumla.”
Dkt. Robert Mvungi, Daktari Bingwa wa Moyo na Rais wa Taasisi ya Moyo ya Tanzania, alibainisha kuwa, “Ushirikiano wetu na Hospitali ya Aga Khan na wadau wengine unalenga kupunguza vifo vinavyotokana na magonjwa yasiyoambukiza, ikiwemo magonjwa ya moyo. Kwa sasa, asilimia 12.91 ya vifo nchini Tanzania vinatokana na magonjwa yasiyoambukiza, huku asilimia 1.43 ikihusishwa na magonjwa ya moyo yanayotokana na shinikizo la damu. Kupitia uhamasishaji, uchunguzi wa kawaida wa moyo, na matibabu bora, tunaweza kuboresha hali ya afya ya moyo katika jamii.”
Kwa upande wake, Dkt. Javed Jalbani, Daktari Bingwa wa Moyo, aliwakumbusha washiriki kutozipuuza dalili za magonjwa ya moyo, akisema, “Ni muhimu kutambua dalili za awali za shambulio la moyo na kuchukua hatua za haraka ili kuokoa maisha. Katika Siku hii ya Moyo Duniani, tuweke afya ya moyo kuwa kipaumbele.”
Hospitali ya Aga Khan inajivunia kushiriki katika kukuza uelewa kuhusu afya ya moyo na inatarajia kuendelea na juhudi hizi muhimu katika siku zijazo.
