Katika ziara yake ya siku 7 mkoani Shinyanga, Naibu Katibu Mkuu wa CCM Bara, John Mongella, ameweka bayana kwamba Chama Cha Mapinduzi (CCM) ndicho chimbuko la demokrasia nchini Tanzania, akisisitiza kuwa mafanikio ya sasa yanatokana na uongozi wa chama hicho, hususan chini ya Rais Dk. Samia Suluhu Hassan. Akizungumza mbele ya wanachama wa CCM katika Halmashauri ya Msalala, Kahama, Mongella aliweka mkazo juu ya jukumu la CCM kama mlinzi wa misingi ya utawala bora na maendeleo ya nchi.
Mongella alieleza kuwa falsafa ya 4R inayosimamiwa na Rais Dk. Samia – Maridhiano, Ustahamilivu, Mageuzi, na Kujenga upya Taifa – imekuwa dira muhimu kwa Taifa katika kipindi hiki cha mageuzi. Alitoa wito kwa wanachama wa CCM na wananchi kwa ujumla kuichukulia falsafa hiyo kama mwongozo wa kila siku, ili kuendeleza amani na mshikamano katika jamii.
“CCM imekuwa chachu ya siasa safi na demokrasia nchini, na sasa zaidi ya hapo, tunashuhudia jinsi serikali chini ya Rais Dk. Samia inavyosimamia mabadiliko ya kweli katika sekta mbalimbali,” alisema Mongella, akiongeza kuwa mafanikio haya ni matokeo ya uongozi thabiti wa chama hicho.
Katika mazungumzo yake, alisisitiza kuwa demokrasia siyo tu kuwa na vyama vingi, bali inahusisha ushirikiano wa kitaifa, utulivu, na kuhakikisha wananchi wanapata huduma bora, yote ambayo yanasimamiwa vyema na CCM.
