Mwenyekiti wa Jukwaa la Wahariri Tanzania (TEF), Deodatus Balile amesema wanafunzi katika tasnia ya habari wanapaswa kupewa motisha.
Ametoa kauli hiyo leo katika hafla ya kuwapa zawadi wanafunzi waliofanya vizuri katika Chuo Kikuu cha Tumaini (Tudarco), jijini Dar es Salaam.
Balile alikuwa akimkabidhi zawadi Mwanafunzi Patson Andungalile aliyefanya vizuri katika masomo ya uandishi wa habari chuoni hapo.
“Tumeshuhudia tasnia nyingine wanafunzi wanapofanya vizuri, hupewa zawadi. Sasa ni wakati muafaka wa kuwatia moyo wanafunzi katika tasnia hii ili naye akimaliza ajue kuwa anatambulika,” amesema Balile.
Balile amewataka wanafunzi wa taalama ya habari kuhakikisha wanajiandaa vizuri ili wakiingia kwenye vyombo vya habari, wapate kuajiriwa.
