Na Mwamvua Mwinyi, Pwani
SERIKALI Mkoani Pwani ,imeutaka Wakala wa Ufundi na Umeme Tanzania (TEMESA )kufanya majukumu yake kwa uaminifu na kufuata maelekezo yanayotolewa na Serikali ili kuondoa malalamiko kwa wateja .
Akimwakilisha mkuu wa Mkoa wa Pwani, katika kikao cha Pwani na wadau, kwenye ukumbi wa Destiny Hall,Kibaha KwaMatias ,Mkuu wa wilaya ya Rufiji Meja Edward Gowelle alieleza kipindi cha nyuma ,TEMESA ilinyooshewa vidole kwa gharama kubwa za matengenezo, matengenezo kuchukua muda mrefu na kuchakaa kwa miundombinu.
“Sisi Kama Serikali ,tunaimani na TEMESA ya sasa ,kwani tumeona mikakati yao inayolenga kuondoa keep na changamoto zilizokuwa zikilalamikiwa , Tunaimani zile taasisi na watu ambao waliondoa Imani na kukata tamaa watarudi kujionea huduma zilizoboreshwa na kuingia mikataba upya”
“Tumefurahishwa kwa maboresho mbalimbali ,ni Imani yangu uboreshaji huo utaleta tija na kutendea haki fedha zinazotengwa na Serikali kuzielekeza TEMESA “alieleza Gowelle.
Awali akitoa taarifa fupi ya TEMESA , Mtendaji Mkuu wa TEMESA Lazaro Kilahala aliishukuru Serikali ya awamu ya sita na Rais Samia Suluhu Hassan kwa kuendelea kufanya uwekezaji mkubwa TEMESA ili kuweza kutoa huduma bora.
Alieleza ,kwa mwaka wa fedha 2022/2023 jumla ya Bilioni 22 zilipokelewa TEMESA kwa ajili ya kazi za karakana,ufundi na vivuko.
“Changamoto kubwa ya awali ni magari kuchelewa TEMESA,tumejitathmini na kugundua tatizo ni mchakato wa ununuzi ambao mlolongo wake ulikuwa mrefu,tumebadili utaratibu ,sasa tumeingia mkataba na wazabuni wa vipuri na vilainishi nchini nzima ili kuondoa adha hiyo”
Kilahala alisema ,pia wamefunga mfumo wa CCTV camera kwenye karakana zao ili kuhakikisha usalama wa vifaa vya wateja ambao kipindi cha nyuma ulilalamikiwa kuwepo mazingira ya udokozi dokozi kwa vifaa vyao, na sasa utaratibu ulipo ni uwazi ,vifaa vinavyofunguliwa vitarudi kwa mteja.
Meneja wa TEMESA Pwani ,Mhandisi Rehana Yahaya alieleza wana wilaya Saba na karakana mbili ambazo zinatoa huduma kwa ukaribu kwa wateja wake.
Rehana alieleza,wamejipanga kuboresha huduma zao ,kufanya matengenezo kwa wakati na kuboresha huduma za vivuko.
“Kuna changamoto ya kivuko Wilaya ya Mafia ,kwasasa kivuko ni kimoja Mv Kilindoni kinajengwa kingine ili kutoa huduma nzuri na kutatua tatizo la usafiri wa uhakika Mafia “alibainisha Rehana.
Mhandisi Hassan Karounda ,Mkurugenzi wa matengenezo na huduma za ufundi TEMESA ,alieleza katika kuboresha huduma zao karakana 13 zinafanyiwa ukarabati nyingine ukarabati zimefikia zaidi ya asilimia 90 .
Alieleza ,pia wametoa mafunzo kwa mafundi wao ili kuendana na teknolojia mpya , ambapo wameshapeleka mafundi 50 chuo kikuu na NIT.
