**********************************
NA EMMANUEL MBATILO
Klabu ya Simba imefanikiwa kuitungua klabu ya Kagera Sugar magoli 3-0 na kuvunja mwiko wa kutopata matokeo katika uwanja wa Kaitaba kwa muda mrefu.
Msimu uliopita klabu ya Simba iliambulia kichapo mara mbili dhi ya klabu hiyo ya masikani yake mjini Kagera hivyo kwa matokeo ya leo yanadhihilisha kwamba timu hiyo imejiandaa vizuri kuwania taji la ligi kwa mara nyingine tena.
Bao la kwanza la Simba limewekwa kambani na Meddie Kagere kwa mpira wa kichwa mnamo dakika ya nne akipokea pasi kutoka kwa mshambuliaji mpya wa klabu hiyo, Deo Kanda.
Simba ilionekana kuliandama lango la klabu ya Kagera Sugar na dakika ya 35 kipindi hichohicho cha kwanza, Mohammed Hussein naye aliingia kambani kwa kumalizia pasi nzuri ya Kagere na kuweza kuielekeza kambani moja kwa moja.
Mpaka dakika 45 za kwanza zinamalizika, Simba ilikuwa mbele kwa mabao hayo 2-0,
Kipindi cha pili kilianza kwa Kagera kuamka wakisaka bao kwanza lakini jitihada zao ziligonga mwamba kutokana na uimara wa Simba eneo la ulinzi.
Katika dakika ya 78 tena, Kagere aliingia kambani kwa njia ya penati baada ya Miraji Atumani kufanyiwa madhambi eneo la hatari.
Mpaka mpira kumalizika klabu ya Simba ilifanikiwa kutoka kifua mbele kwa ushindi wa magoli 3-0.
