Thamani ya mfuko wa NSSF imeongezeka kwa asilimia 16 ndani ya mwaka mmoja, huku Mkuu wa Mkoa wa Tanga, Dk Batilda Burian, akiwataka waajiri kulipa michango ya wafanyakazi kwa wakati na kutumia fursa ya msamaha wa tozo.
Na Oscar Assenga, Tanga
THAMANI ya Mfuko wa Taifa wa Hifadhi ya Jamii (NSSF) imefikia Sh trilioni 11.42 hadi Juni mwaka huu, kutoka Sh trilioni 9.84 zilizorekodiwa Juni 2025, ikiwa ni ongezeko la asilimia 16.
Kutokana na ukuaji huo, Mkuu wa Mkoa wa Tanga, Dk Batilda Burian, ameitaka menejimenti ya mfuko huo kuendelea kuboresha huduma kwa wanachama na kuhakikisha zinawafikia wananchi katika maeneo yao.
Alisema hayo wakati wa kilele cha Wiki ya Huduma kwa Wateja ya NSSF mkoani Tanga, akisisitiza kuwa huduma bora zinapaswa kuonekana kwa vitendo kwa wanachama wa sekta rasmi na isiyo rasmi.
Dk Burian alisema matumizi ya teknolojia ya habari na mawasiliano (TEHAMA) pamoja na kuongeza mawakala vijijini ni hatua zinazoweza kurahisisha upatikanaji wa huduma za hifadhi ya jamii kwa wananchi wengi zaidi.
Alisema wanachama wanapaswa kutambuliwa kulingana na mahitaji yao, wakiwamo wakulima, wafanyabiashara wadogo, wajasiriamali na wafanyakazi wa viwandani, badala ya kuchukuliwa kama namba katika mifumo ya huduma.
Katika hatua nyingine, aliielekeza menejimenti ya NSSF mkoani Tanga kuendelea kuwafuatilia waajiri wanaoshindwa kuwasilisha michango ya wafanyakazi wao kwa wakati.
Alisema zoezi la kuwafuatilia waajiri lililofanyika mwaka juzi liliwezesha kukusanywa kwa Sh milioni 633, hivyo akaitaka timu ya mkoa kuendelea na kazi hiyo ili kuhakikisha michango inawasilishwa kwa mujibu wa taratibu.
Dk Burian pia aliwataka waajiri wenye malimbikizo ya michango kutumia fursa ya msamaha wa tozo iliyotolewa na NSSF kabla ya Desemba 31, 2026, ili kurekebisha madeni yao na kulinda haki za wafanyakazi.
Aidha, aliipongeza NSSF kwa kuboresha mifumo ya ulipaji mafao, akisema kupungua kwa muda wa kushughulikia malipo kutoka siku 60 hadi 19 ni hatua inayopunguza usumbufu kwa wanachama.
Alisema huduma za kidijitali zinapaswa kuendelea kuimarishwa ili wanachama waweze kufuatilia michango na kuwasilisha madai ya mafao bila kulazimika kufika katika ofisi za mfuko huo.
Dk Burian pia aliitaja NSSF kuwa miongoni mwa taasisi zilizochangia kuendeleza shughuli za kiwanda cha mkonge cha Sisalana, akisema hatua hiyo imesaidia kulinda ajira za wafanyakazi zaidi ya 1,000.
Awali, Mkurugenzi Mkuu wa NSSF, Masha Mshomba, alisema mfuko huo utaendelea kushirikiana na uongozi wa mkoa kuwafikia watu waliojiajiri na walio katika sekta isiyo rasmi ili waweze kunufaika na huduma za hifadhi ya jamii.
Mshomba alisema matumizi ya TEHAMA yamechangia kuboresha utendaji wa mfuko huo, akieleza kuwa muda wa wastani wa kulipa mafao kwa wastaafu umepungua kutoka siku 63 mwaka wa fedha 2020/21 hadi siku 19 kwa sasa.
Alisema NSSF itaendelea kuimarisha huduma kwa wateja na kuwataka watumishi kuongeza juhudi ili kuhakikisha wanachama wanapata huduma kwa wakati.
Aliongeza kuwa thamani ya mfuko ilipofikia Sh trilioni 4.8 Machi 2021, ilikuwa chini kwa kiasi kikubwa ikilinganishwa na Sh trilioni 11.42 zilizofikiwa Juni mwaka huu, jambo linaloonyesha ukuaji wa thamani ya mfuko katika kipindi hicho.
