Dar es Salaam, Agosti 14, 2026 — Chama cha ACT Wazalendo kimesema wahusika wawajibike kutokana na kifo cha kijana Seif Mussa (25), anayesema alifariki baada ya kukamatwa na kudaiwa kuteswa na askari wa Hifadhi ya Ngorongoro.
Akizungumza kupitia taarifa iliyotolewa Agosti 14, 2026, Waziri Kivuli wa Maliasili, Utalii, Utamaduni na Michezo wa ACT Wazalendo, Emmanuel Ntobi, amesema chama hicho kinawalaani vikali askari wa hifadhi wanaotuhumiwa kufanya vitendo vya ukatili dhidi ya wananchi, ikiwemo mateso, unyanyasaji na mauaji.
Kwa mujibu wa taarifa hiyo, Seif Mussa na wenzake wawili, Salimu Haji na Abdallah Nuru, walikamatwa baada ya kupotea njia na kuingia katika eneo la Hifadhi ya Ngorongoro. ACT Wazalendo inadai vijana hao hawakukutwa na nyara wala kiashiria cha uhalifu, lakini walipata mateso makali yaliyosababisha kifo cha Seif na majeraha kwa wenzake.
ACT Wazalendo imesema hatua ya Jeshi la Polisi kuwakamata askari waliokuwa zamu wakati wa tukio kwa ajili ya uchunguzi ni muhimu, lakini haitoshi, ikidai matukio kama hayo yamekuwa yakiripotiwa katika maeneo mbalimbali ya hifadhi nchini bila kuwapo kwa uwajibikaji wa kutosha.
Chama hicho kimetaja pia matukio yanayodaiwa kutokea katika Hifadhi za Taifa za Ruaha, Saadani na Ziwa Manyara, pamoja na Hifadhi ya Misitu Mbarali, na kuitaka Serikali kuchukua hatua za haraka kukomesha vitendo vya ukatili dhidi ya wananchi.
Miongoni mwa madai ya ACT Wazalendo ni Serikali kugharamia matibabu ya vijana waliojeruhiwa, kulipa fidia kwa familia ya Seif Mussa na waathirika wengine, pamoja na kuwachukulia hatua za kisheria askari wote watakaobainika kuhusika na ukatili huo.
Aidha, ACT Wazalendo imesema viongozi wenye dhamana wawajibike kutokana na kadhia hiyo, akiwemo Waziri wa Maliasili na Utalii, Ashatu Kijaji, pamoja na Kamishna wa Uhifadhi wa Mamlaka ya Hifadhi ya Ngorongoro (NCAA), Abdul Razaq Badru.
Chama hicho pia kimetaka Serikali kutekeleza mapendekezo ya Ripoti ya Tume ya Haki Jinai kuhusu mageuzi ya kimfumo katika majeshi nchini, ikiwemo kuondoa hadhi ya kijeshi kwa askari wa hifadhi na kurekebisha mifumo yao ya utendaji na uwajibikaji.
ACT Wazalendo kimetoa pole kwa familia ya Seif Mussa na kuwatakia ahueni vijana waliojeruhiwa, huku kikisema kitaendelea kusimama pamoja na wananchi wanaodai haki, uwajibikaji na utawala wa sheria.
