Naibu Katibu Mkuu wa Chama Cha Mapinduzi (CCM) Bara, Komredi John Mongella, ameendelea kusukuma mbele juhudi za maendeleo vijijini baada ya kupokea taarifa muhimu ya utekelezaji wa mradi wa upanuzi wa skimu ya maji kutoka kijiji cha Nyankende hadi kijiji cha Mwadui, Halmashauri ya Ushetu, mkoani Shinyanga. Ziara hiyo ya tarehe 8 Septemba 2024, ililenga kukagua na kutoa msukumo zaidi kwenye miradi inayolenga kuboresha maisha ya wananchi hususan kupitia upatikanaji wa maji safi na salama.
Akizungumza wakati wa ziara hiyo, Meneja wa Wakala wa Usambazaji Maji na Usafi wa Mazingira Vijijini (RUWASA) Wilaya ya Kahama, Mhandisi Maduhu Magili, alieleza kuwa mradi huo unakaribia kukamilika kwa asilimia 85, na unatarajiwa kukamilika ndani ya mwezi huu wa Septemba 2024. Mradi huo, ambao chanzo chake ni kisima kirefu kilichopo kijiji cha Nyankende chenye uwezo wa kuzalisha lita 14,000 za maji kwa saa, unatarajiwa kutoa suluhu ya kudumu kwa tatizo la uhaba wa maji katika kijiji cha Mwadui.
Mhandisi Magili alifafanua kuwa lengo kuu la mradi huo ni kumaliza kero ya maji kwa wakazi takribani 2,058 wa kijiji cha Mwadui, huku akisisitiza kuwa serikali ya awamu ya sita imejipanga kwa vitendo kuhakikisha kuwa mama wa Kitanzania anatuliwa ndoo kichwani. Hii ni sehemu ya jitihada pana za kuimarisha huduma za kijamii, kuboresha afya za wananchi, na kuchochea shughuli za kiuchumi.
Mradi huo unagharimu zaidi ya shilingi milioni 300, fedha zilizotolewa na serikali kupitia mpango wa kuleta maendeleo kwa wananchi vijijini. Mongella aliwapongeza wananchi na viongozi wa mkoa wa Shinyanga kwa ushirikiano wao katika kutekeleza miradi ya maendeleo, huku akihimiza kasi zaidi ili kuhakikisha mradi unakamilika kwa wakati na kwa viwango vinavyotarajiwa.
Aidha, Mongella aliwataka wakazi wa maeneo husika kutumia vyema huduma za maji zitakazopatikana, huku akiwahimiza kujali na kutunza miundombinu ya maji ili iweze kudumu na kuendelea kuwanufaisha kwa muda mrefu. Pia alisisitiza umuhimu wa ushirikiano kati ya wananchi, serikali, na wadau mbalimbali katika kufanikisha miradi mingine ya kijamii kwa ajili ya maendeleo ya taifa.
Ziara hii ya Mongella inaonyesha nia ya dhati ya Chama Cha Mapinduzi katika kusukuma mbele maendeleo vijijini, hasa katika sekta za maji, afya, na miundombinu, sambamba na kuunga mkono juhudi za Rais Samia Suluhu Hassan za kuwaletea wananchi maendeleo na kuboresha maisha yao kwa vitendo.
