Mkuu wa mkoa wa Ruvuma Kanal Laban Thomas kushoto na Kaimu Mkuu wa wilaya ya Nyasa Aziza Mangosongo wakikagua Barabara mpya ya Njambe-Ndonga yenye urefu wa km 7 iliyojengwa na wakala wa Barabara za mjini na vijijini(TARURA)kwa gharama ya zaidi ya Sh.milioni 220.
Mkuu wa mkoa wa Ruvuma Kanal Laban Thomas akichanganya mchanga baada ya kukagua ujenzi wa Barabara mpya ya Njambe hadi Ndonga wilayani Nyasa,kushoto Mwenyekiti wa Chama cha Mapinduzi mkoa wa Ruvuma Oddo Mwisho,katikati Kaimu Mkuu wa wilaya ya Nyasa Aziza Mangosongo,kulia meneja wa Tarura wilaya ya Nyasa Thomas Kitusi na wa pili kulia meneja wa Tarura mkoa wa Ruvuma Wahabu Nyamzungu.
Meneja wa Tarura wilaya ya Nyasa Mhandisi Thomas Kitusi kushoto,akitoa taarifa ya ujenzi wa Barabara ya Njambe-Ndonga yenye urefu wa km 7 kwa Mkuu wa mkoa wa Ruvuma Kanal Laban Thomas ambayo ujenzi wake umekamilika kwa asilimia 99,kulia kaimu Mkuu wa wilaya hiyo Aziza Mangosongo na wa pili kushoto Mwenyekiti wa CCM Mkoa wa Ruvuma Oddo Mwisho.
Muonekano wa kipande cha Barabara mpya ya Njambe hadi Ndonga wilayani Nyasa inayojengwa kwa kiwango cha changarawe na wakala wa Barabara za mjini na vijijini(Tarura)wilayani Nyasa.
Mkazi wa kijiji cha Ndonga kata ya Liwundi wilayani Nyasa Marietha Mkondola akipiga magoti na kushukuru baada ya Serikali kupitia wakala wa Barabara za mjini na vijijini Tarura kwa mara ya kwanza tangu Uhuru wa Tanganyika na sasa Tanzania kujenga Barabara mpya inayounganisha kijiji na maeneo mengine.
Mkuu wa mkoa wa Ruvuma Kanal Laban Thomas akikagua ubora wa Kalavati lililojengwa kwenye Barabara ya Njambe-Ndonga na wakala wa Barabara za mjini na vijijini Tarura kwa gharama ya zaidi ya Sh.milioni 220,305,000.00.
Meneja wa Tarura mkoa wa Ruvuma Mhandisi Wahabu Nyamzungu wa pili kulia,akimpa maelezo Mwenyekiti wa Chama cha Mapinduzi mkoa huo Oddo Mwisho wa tatu kushoto, kuhusu ujenzi wa Barabara mpya ya Njambe-Ndonga ambayo imerudisha mawasiliano ya barabara kati ya kijiji cha Ndonga na maeneo mbalimbali ya kata yaLiwundi na kata jirani ya Kihagara,kulia Mkurugenzi Mtendaji wa Halmashauri ya Nyasa Jimson Mhagama.
Mkazi wa kijiji cha Ndonga Halmashauri ya wilaya Nyasa mkoani Ruvuma Bi Marietha Mkondola akiwa amelala chini kwa furaha baada ya kumuona Mkuu wa mkoa wa Ruvuma Kanal Laban Thomas(hayupo pichani)ambaye akiwa Mkuu wa wilaya Nyasa ndiye aliyefanikisha ujenzi wa Barabara mpya inayounganisha kijiji hicho na maeneo mengine ya kata ya Liwundi wilayani Nyasa,kwa mara ya kwanza wakazi wa kijiji cha Ndonga wameshuhudia magari yakifika katika kijiji hicho tangu Uhuru mwaka 1961 baada ya Serikali ya awamu ya sita inayoongozwa na Rais Samia Suluhu Hassan kupitia Tarura mkoa wa Ruvuma kujenga barabara mpya kwa kiwango cha changarawe,
Picha zote na Muhidin Amri
…………………………
Na Muhidin Amri,Nyasa
WAKAZI wa kijiji cha Ndonga kata ya Liwundi Halmashauri ya wilaya Nyasa mkoani Ruvuma,wameishukuru serikali kwa kujenga barabara mpya inayounganisha kijiji hicho na Njambe ambayo imesaidia kuondoa kero za muda mrefu zilizosababishwa na kukosekana kwa barabara ya uhakika.
Wamesema hayo jana mbele ya Mkuu wa mkoa wa Ruvuma Kanal Laban Thomas, aliyefika katika kijiji hicho kwa ajili ya kukagua ujenzi wa barabara inayoanzia kijiji cha Njambe hadi Ndonga yenye urefu wa km7.
Barabara hiyo inajengwa na Wakala wa Barabara za mjini na vijijini(Tarura) kwa gharama ya zaidi ya Sh.milioni 220, ambapo itaharakisha shughuli za uchumi na uzalishaji mali hasa kusafirisha dagaa kutoka ziwa nyasa kwenda maeneo mengine ya Tanzania.
Marietha Mkondola alisema, katika kijiji hicho hakukuwa na huduma yoyote ya mawasiliano ya barabara tangu uhuru mwaka 1961,badala yake wananchi walipotaka kusafiri kwenda maeneo mengine wakiwamo watumishi wa umma walilazimika kutumia mitumbwi na boti hali ambayo imechelewesha sana uchumi wao.
Mkondola alisema,kukamilika kwa barabara hiyo sasa kutasaidia hata makazi yao hasa ardhi kuwa na thamani kubwa na kuongezeka kwa idadi ya watu watakaokuwa wanaitumia kwa ajili ya shughuli mbalimbali za kiuchumi.
Aidan Mbele alisema,tangu serikali ya awamu ya sita ilipoingia madarakani mwaka mmoja uliopita,wameshuhudia maendeleo makubwa katika kijiji chao ambapo serikali imejenga na kuboresha huduma za kijamii ikiwamo umeme na barabara.
Kwa upande wake Mkuu wa mkoa wa Ruvuma Kanal Laban Thomas,ameishukuru serikali ya awamu ya sita inayoongozwa na Rais Samia Suluhu Hassan kwa namna ambavyo imeiangalia barabara hiyo kwa jicho la pili kwani wananchi walikuwa wanapata changamoto kubwa ya usafiri pindi wanapohitaji kwenda maeneo mengine.
Alisema,serikali inafanya kazi kubwa ya kutatua kero mbalimbali katika sekta ya barabara,umeme na nyingine kwa kuendelea kutoa fedha kwa ajili ya kujenga na kukarabati barabara kwa lengo la kurahisisha huduma ya usafiri na usafirishaji wa bidhaa ili kukuza uchumi.
Alisema,kijiji hicho kilikuwa kama kisiwa kwa sababu kukosekana kwa mawasiliano ya barabara ambapo alitolea mfano,kwenda makao makuu ya kata Liundi walilazimika kutumia mitumbwi ambayo wakati mwingine haikuwa salama.
Amewataka wananchi wa kijiji cha Ndonga kutambua kuwa barabara hiyo ni yao,hivyo wana wajibu wa kuilinda kwa ari na mali ili iweze kudumu kwa muda mrefu na waitumie kwa ajili ya shughuli zao za maendeleo.
Kanal Laban,amemuagiza Meneja wa Tarura wilaya ya Nyasa Mhandisi Thomas Kitusi, kuhakikisha inafanya marekebisho kwa baadhi ya maeneo ambayo yatajengwa makalavi.
Meneja wa Tarura wilayani Nyasa Thomas Kitusi alisema,Barabara hiyo inaunganisha kata ya Kihagara na Liwundi hadi sasa wametumia kiasi cha Sh.milioni 220,305,000.00 kuifungua barabara hiyo katika kipindi cha miaka miwili ambapo awali katika kijiji hicho hakukuwa na mawasiliano yoyote ya barabara.
Alisema,tangu uhuru barabara hiyo haikupitika na hivyo wananchi wa kijiji hicho hawakuwahi kuona gari,na usafiri pekee ulikuwa mitumbwi na boti na kuishukuru serikali ya awamu ya sita kwa kutoa fedha ambazo zimetumika kufungua barabara hiyo.
