TAASISI YA NELSON MANDELA YAJA NA MFUMO KUBAINI MACHAPISHO YA WIZI

MAKAMU Mkuu wa Taasisi ya Afrika ya Sayansi na Teknolojia ya Nelson Mandela,Prof.Emmanuel Luoga,akizungumza na waandishi wa habari kuhusu Utekelezaji wa Shughuli mbalimbali za Taasisi hiyo na mwelekeo wa utekelezaji wa bajeti kwa mwaka wa fedha 2022/2023 leo Oktoba 20,2022 jijini Dodoma.

MAKAMU Mkuu wa Taasisi ya Afrika ya Sayansi na Teknolojia ya Nelson Mandela,Prof.Emmanuel Luoga,akijibu maswali mbalimbali yaliyoulizwa na waandishi wa habari (hawapo pichani) kuhusu Utekelezaji wa Shughuli mbalimbali za Taasisi hiyo na mwelekeo wa utekelezaji wa bajeti kwa mwaka wa fedha 2022/2023 leo Oktoba 20,2022 jijini Dodoma.

Mkurugenzi wa Idara ya Habari na Msemaji Mkuu wa Serikali, Gerson Msigwa,akizungumza mara baada ya Taasisi ya Afrika ya Sayansi na Teknolojia ya Nelson Mandela kutoa taarifa kuhusu Utekelezaji wa Shughuli mbalimbali za Taasisi hiyo na mwelekeo wa utekelezaji wa bajeti kwa mwaka wa fedha 2022/2023 leo Oktoba 20,2022 jijini Dodoma.

…………………………..

Na Alex Sonna-DODONMA

TAASISI ya Afrika ya Sayansi na Teknolojia ya Nelson Mandela ipo katika hatua za mwisho kuingiza sokoni mfumo wa kubaini machapisho ya wizi ambapo mfumo uliokuwa ukitumika katika vyuo vingi ni wa kutoka nje na wa gharama kubwa.

Hayo yamesemwa leo Oktoba 22,2022 jijini Dodoma na Makamu Mkuu wa Taasisi hiyo, Prof.Emmanuel Luoga,wakati akitoa taarifa kuhusu Utekelezaji wa Shughuli mbalimbali za taasisi hiyo na mwelekeo wa utekelezaji wa bajeti kwa mwaka wa fedha 2022/2023.

Prof. Luoga amesema kuwa Taasisi hiyo imejikita katika matumizi ya TEHAMA ambapo itapata Dola za Marekani milioni 10 mkopo wa masharti nafuu kutoka Benki ya Dunia, fedha hiyo itatumika kuimarisha mifumo ya TEHAMA na kuhakikisha inapata ithibati ya maabara ya viwango vya kimataifa.

“Taasisi imejikita katika kuboresha ufundishaji kwa kutumia teknolojia ya masafa (e-learning) kwa waadhiri na kupanua wigo kwa wanafunzi walio mbali na kampasi kupata elimu ya masafa,”amesema Prof.Luoga

Amesema kuwa mpaka sasa taasisi imefanya bunifu 73 ambazo ni matokeo ya ushirikiano wa hali ya juu kati ya wahadhiri na wanafunzi pamoja na Serikali na wadau wa maendeleo kutoka nje ya nchi.

“Katika masuala ya utafiti na ubunifu, mpaka sasa taasisi yetu imefanikiwa kufanya bunifu 73 ambazo ni matokeo ya ushirikiano wa hali ya juu kati ya wahadhiri na wanafunzi pamoja na Serikali na wadau wa maendeleo kutoka nje ya nchi,”Amesema Prof.Luoga

Prof.Luaga amesema kuwa taasisi hiyo kwa kushirikiana na taasisi zingine mbili wanaanzisha Kituo cha Umahiri cha Ndizi ambacho kitahusika na masuala ya utafiti wa mbegu, namna ya kuongeza tija katika upandaji na usimamizi wa zao la ndizi na matumizi bora.

Aidha amesema Katika bajeti ya mwaka wa fedha 2022/23, Serikali imeidhinisha bajeti ya takriban Shilingi bilioni 43 kwa ajili ya taasisi hiyo ambapo kipaumbele kikubwa ni ujenzi wa bweni maalum kwa ajili ya wanachuo wanawake wenye mahitaji maalum na wenye watoto wadogo ambao mradi huo tayari umeshaanza tangu Oktoba, 2021 na kiasi cha Shilingi bilioni 1.7 kimeshatumika.

“Ujenzi huu utafanyika kwa awamu tatu, awamu ya kwanza ambayo itachukua wanafunzi 180 imekadiriwa kutumia Shilingi bilioni 4.8 na inatarajiwa kukamilika Juni, 2023. Ujenzi wake umefikia asilimia 43,”Amesema Prof.Luoga

Prof.Luoga amesema kuwa mnamo Mwaka 2021, taasisi ilitengeneza Mpango Mkakati mpya ambapo chuo kimejitanua kwa kuongeza ngazi mbili za masuala ya atamizi za teknolojia na ubiasharishaji.

Kwa upande wake, Mkurugenzi wa Idara ya Habari na Msemaji Mkuu wa Serikali, Gerson Msigwa, amesema kuwa serikali inafanya kazi kubwa kuandaa wanasayansi kutoka shule za msingi mpaka shahada za kwanza ambapo kwa sasa inajenga shule moja ya sekondari ya masomo ya sayansi kwa kila mkoa kwa ajili ya wasichana.

“Naipongeza taasisi hii kwa kutilia mkazo maalum kwenye kutoa elimu ya sayansi kwa wanawake,”amesema Msigwa

Aidha Msigwa ametoa wito kwa vyuo mbalimbali nchini kuweka kozi za umahiri kwa Waandishi wa Habari ili wakafanye tafiti za kutosha, hivyo kuondokana na kutoa habari za uongo na zisizokuwa na tija kwa umma.