*************************************
Na Mwamvua Mwinyi,Mkuranga
MBUNGE wa Jimbo la Mkuranga,Abdallah Ulega ametoa mipira na jezi katika baadhi ya vijiji- na Shule za sekondari kata ya Panzuo na Bupu kwa ajili ya kuendeleza michezo na kinyang’anyiro Cha Ulega Cup.
Akikabidhi jezi mbili na mipira miwili Kijiji Cha Mbulani kata ya Panzuo,Ulega alisema aliwahi kuahidi kutoa jezi kwa kila Kijiji na sasa ni wakati muafaka.
Mbunge huyo alihimiza vijana kwa watu wazima kujenga tabia ya kupenda mazoezi na michezo ili kuimarisha afya zao.
“Jezi hizi najua nazitoa lakini kuna timu zilizopo katika baadhi ya vijiji ni mbili ama tatu ,mnatakiwa madiwani muandae mechi za kushindania hizi jezi ili mshindi mumpatie “alifafanua Ulega.
Ulega alitoa jezi mbili na mipira miwili Kijiji Cha Mbulani ,shule ya sekondari Panzuo jezi moja na mpira kwa timu ya mpira wa miguu na wanawake.
Pia jezi nyingine Kijiji Cha Kibudi na mpira,KondoMwelanzi ,Kijiji Cha Tundu,Bupu, Mandikongo sekondari ambapo alikabidhi jezi mbili na mipira miwili kwa timu ya mpira wa miguu na wanawake shuleni hapo.
Hata hivyo ,aliwaasa walimu na wanafunzi kuendeleza michezo mashuleni ili kujenga akili na kuimarisha mwili kiafya ambapo pia aliwataka wanafunzi wa kidato Cha nne kusoma kwa bidii kipindi kifupi kilichobaki kuelekea mtihani wa Taifa na atakaepata Division 1 atampatia kiasi Cha sh .300,000.
