Wanafunzi wa Shule ya Msingi Nambila kijiji cha Mkali A Kata ya Liuli wilayani Nyasa mkoani Ruvuma wakivuka Mto Mbahwa hali ambayo ni hatari kwa maisha yao.
Mkazi wa Kijiji cha Mkali B, Kata ya Liuli mkoani Ruvuma, John Nombo akielezea namna Mto Mbahwa ulivyo kero kwa wanafunzi na wananchi wa kijiji hicho.
……………………………………………………………………………………………….
NA SULEIMAN MSUYA, NYASA
KUKOSEKANA kwa daraja la uhakika Mto Mbahwa katika vijiji vya Mkali A na Mkali B, Kata ya Liuli wilayani Nyasa mkoani Ruvuma, kumetajwa kuhatarisha usalama na maisha ya wanafunzi na wananchi wa vijiji hivyo.
Mwandishi wa habari hii alitembelea mto huo hivi karibuni ambapo alishuhudia wanafunzi na wananchi wanaoishi maeneo ya mashambani wakivuka kwa shinda baada daraja la awali kusombwa na maji.
Akizungumzia adha hiyo Mwanafunzi Neema Kawonga wa Shule ya Msingi Nambila, amesema kukosekana kwa daraja hilo kunahatarisha maisha yao na mahudhurio kuwa hafifu.
Mwanafunzi huyo amesema wamekuwa na moyo wa kusoma ila changamoto ya Daraja la Mbila inawakatisha tamaa hivyo wanaiomba Serikali iwasaidie kujenga.
Kawonga amesema kutokana na kero hiyo hasa kipindi cha masika kama sasa wanashindwa kwenda shule kwa kushindwa kuvuka maji.
“Tunapenda shule pamoja na umbali wa zaidi ya kilometa tatu ila tukifika hapa darajani maji yamejaa tunarudi nyumbani inauma sana,” amesema.
Kawonga amesema kutokana na changamoto hiyo wapo wanafunzi wanaokata tamaa ya kusoma hivyo ombi lake ni serikali kujenga daraja katika eneo hilo.
“Huku ndipo wanazaliwa waandishi, wahandisi, walimu, madaktari, wahasibu na wengine tunaomba Serikali au wadau wajitokeze kutujengea daraja hili muhimu,” amesema.
Kwa upande wake Mwalimu Mkuu wa Shule Nambila Erasimus Haule amesema kukosekana kwa daraja hilo kuna madhara makubwa kwa wanafunzi wanoishi upande wa mashambani.
Haule amesema wanafunzi wamekuwa wakikosa vipindi wakati wa masika jambo ambalo linashusha ufaulu wao.
“Ni kweli kukosekana kwa daraja kuna athari kubwa kwa wanafunzi wangu zaidi 150 wanaishi upande wa mashambani naomba Serikali ifanyie kazi hii changamoto,” amesema.
Naye John Nombo Mkazi wa Kijiji cha Mkali B amesema ukosefu wa daraja sio changamoto kwa watoto pekee hata kwa wananchi wengine.
Nombo amesema wakati wa mvua za masika hata watu wazima wanashindwa kwenda mashambani na wamashambani wanashindwa kuja mjini.
“Hapa tatizo ni kubwa sana sio kwa watoto wa shule pekee hata sisi watu wazima kipindi cha masika hatufanyi kazi za kilimo na ukikutwa na mvua shambani basi inabidi ubaki huko hadi mvua iishe,” amesema.
Mbunge wa Jimbo la Nyasa, Mhandisi Stella Manyanya amesema changamoto hiyo miumbombinu anaijua na amekuwa akiiombea hela mara kwa mara.
Amesema Halmashauri imekuwa ikitafuta fedha za kujenga daraja katika eneo hilo ili kuondoa adha hiyo kwa wanafunzi na wananchi.
“Changamoto hiyo inajulikana na tumekuwa tukiiombea fedha kuanzia ngazi ya halmashauri na bungeni ila bajeti inayotolewa kwa Wakala wa Barabara Mijini na Vijijini (TARURA) ni ndogo,” amesema.
Mhandisi Manyanya amesema jimbo hilo lina changamoto ya miundombinu hivyo kuwaomba wapiga kura wake na subira kwani Serikali inafanyia kazi.
Akizungumzia kadhia hiyo Mkuu wa Wilaya ya Nyasa, Isabela Chillumba amesema Serikali inatambua changamoto za miundombinu ya daraja katika vijiji vya Mkali, A, B na Liuli hivyo watajitahidi kurekebisha.
Chilumba amesema Serikali ya wilaya inaendelea kutafuta fedha kupitia vyanzo vyake mbalimbali ili kuhakikisha miundombinu yote inakuwa salama na kupitika muda wote.
“Miundombinu katika wilaya yetu kwa baadhi ya maeneo ni changamoto hivyo tunapambana kuipatia ufumbuzi,” amesema.
