***************************************
Kumetokea mkanganyiko kuhusu dhana nzima ya alichokisema Waziri wa Mawasiliano na Teknolojia ya Habari, Dk Faustine Ndugulile katika mahojiano maalumu na gazeti la Mwananchi toleo la leo Machi 10, 2021.
Mkanganyiko huo umetokana na Maneno “Serikali kuzuia upigaji simu, video za mitandao ya kijamii…” ambayo kimsingi hayakuzungumzwa na Waziri.
Alichosema Dk Ndugulile ni kwamba Serikali iko katika mchakato wa kuandaa mfumo maalumu utakaosaidia kudhibiti utamaduni wa watu kupiga simu kwa kutumia programu ya WhatsApp bila kulipia baada ya kubaini inahusika katika anguko la mapato yanayotokana na simu nyingi zinazoingia na kutoka nje ya nchi. TUNAOMBA RADHI kwa usumbufu wowote uliotokana na mkanganyiko huo.
