……………………………………………………………………………….
Kikosi cha Timu ya Manispaa ya Kinondoni, KMC FC kesho kitaondoka jijini Mwanza kuelekea Mkoani Mara kujiandaa na mchezo wa mzunguko wa 10 ligi kuu soka Tanzania bara dhidi ya biashara mchezo utakaopigwa katika uwanja wa Karume Novemba tatu mwaka huu.
Aidha kikosi hicho pia kinafanya maandalizi kuelekea katika mchezo huo ambapo pamoja na mambo mengine ni kuhakikisha kuwa kinapata matokeo mazuri katika uwanja wa ugenini dhidi ya Timu ya Biashara na hivyo kuendelea kujiweka katika nafasi nzuri.
Kikosi hicho ambacho kinanolewa na Kocha Habibu Kondo kimejipanga kuhakikisha kuwa katika mcheo huo kinapata matokeo mazuri kama ilivyokuwa katika mchezo wa ugenini dhidi ya Gwambina ambapo KMC FC iliondoka na ushindi wa mabao matatu kwa bila na hivyo kuiwezesha timu hiyo kufikisha alama 14 hadi sasa na kuwa katika nafasi ya tano kwenye msimamo wa ligi kuu soka Tanzania bara 2020/2021.
“Pamoja na kwamba mchezo huo utakuwa mgumu, lakini KMC FC imejipanga kuhakikisha kwamba inapata matokeo mazuri, kila kitu ni mipango na utayari, hivyo tupo tayari kukabiliana na mpambano huo kwasababu uwezo tunao, tunakikosi imara ambacho kinaweza kutupatia matokeo sehemu yoyote”.
Hata hivyo katika kikosi hicho, KMC inamajeruhi wawili ambao ni Emanuel Mvuyekule ambaye aliumia katika mchezo dhidi ya Gwambina pamoja na Abdul Hillary ambaye anasumbuliwa na goti ambapo aliumia katika mazoezi ya timu lakini afya zao zinaendelea vizuri.
