YANGA YASHINDWA KUNG’ARA UGENINI,KADI NYEKUNDU MORO NA KAZIMOTO

…………………………………………………………………………

Kikosi cha timu ya  Yanga SC kutoka Dar es Salaam kimelazimishwa sare ya kufungana bao 1-1  na JKT Tanzania katika mchezo wa Ligi Kuu ya Tanzania Bara uliomalizika  Uwanja wa Jamhuri Jijini Dodoma.

JKT Tanzania walikuwa wa kwanza kupata bao kupitia kwa beki wa pembeni wa timu hiyo, Michael Aidan Pius dakika ya 36 kwa shuti la umbali wa mita 35 na akiupitisha mpira juu ya kipa Metacha Boniphace Mnata kufuatia pasi ya kiungo Mwinyi Kazimoto.

Hadi timu hizo zinaenda mapumziko JKT Tanzania walikuwa mbele kwa bao hilo moja.

Kipindi cha pili kilianza kwa timu zote kufanya mabadiliko na katika dakika 40  Yanga SC waliweza kusawazisha kupitia kwa  Patrick Sibomana dakika ya 76 akimalizia mpira uliotemwa na kipa Mohammed Abdulrahman kufuatia shuti la kiungo mwenzake wa kimataifa wa Rwanda, Haruna Hakizimana Niyonzima.

Mechi ‘ikachafuka’ baada ya bao hilo, JKT Tanzania wakicheza kwa kutumia nguvu zaidi kujizuia kuruhusu bao lingine huku Yanga SC wakitafuta bao la ushindi.
Refa Ludovic Charles alilazimika kuwatoa kwa kadi nyekundu, beki Mghana wa Yanga SC Lamine Moro na kiungo mzawa wa JKT, Mwinyi Kazimoto dakika ya 89 baada ya wawili hao kupigana kufuatia kutokea tafrani baina ya wachezaji wa timu zote mbili uwanjani.
Tafrani hiyo ilianza baada ya mabeki wa JKT Tanzania kumuangusha na kumtimba Sibomana, hivyo wachezaji wa Yanga kuingilia kati na ndipo Moro alipokwenda kumpiga teke Kazimoto ambaye alimkimbiza Mghana huyo kutaka kumrudishia, lakini akawahiwa na kuzuiwa.    

Matokeo hayo yanaiongezea pointi moja kila timu, Yanga ikifikisha 55 katika mchezo wa 29 na kubaki nafasi ya tatu nyuma ya Azam FC yenye pointi 57 na Simba SC pointi 72 za mechi 29 – wakati JKT Tanzania inafikisha pointi 43 katika mchezo wa 29 pia na inabaki nafasi ya saba,