Mjumbe wa Kamati ya Maliasili Tarafa ya Mazingara, wilayani Handeni mkoani Tanga, Shabani Mtenguzi akizungumza na waandishi wa habari kuhusu uhifadhi misitu wanaofanya kijijini kwao.
KATIBU Tawala wa Wilaya ya Handeni mkoani Tanga, Boniphace Maiga amesema wapo kwenye mkakati wa kutengeneza miundombinu inayoingia kwenye misitu na vivutio vya utalii ili kuvutia watalii kufika kiurahisi.
Maiga amesema hayo wakati akizungumza na waandishi wa habari waliokuwa wametembelea Msitu wa Asili wa Tarawe uliopo katika Kijiji cha Tarawe Tarafa ya Mazingara wilayani hapo.
Waandishi hao walitembelea msitu huo kupitia uratibu wa Program ya Kuendeleza Mnyororo wa Mazao ya Misitu (FORVAC), inaofanya kazi katika wilaya 10 za Handeni, Kilindi, Mpwapwa, Ruangwa, Nachingwea, Liwale, Namtumbo,Songea, Mbinga na Nyasa.
Akizungumzia mipango hiyo Maiga alisema halmashauri itahakikisha inaboresha na kutengeneza miundombinu mipya ambayo itasaidia watu wanaotembelea maeneo yenye vivutio kufika kirahisi.
Maiga alisema wilaya hiyo ina vivutio vya aina ya kipekee kama Pula Mbili (Pua Mbili), Kungwi na Mwali, Nyoka wakubwa na misitu yenye mazingira mazuri.
Alisema pia wilaya hiyo ndipo alipozaliwa Kibanga Kampiga Mkoloni hivyo waamini uboreshaji na utangazaji wa vivutio hivyo utaongeza mapato ya vijiji na halmashauri.
“Tunatambua uwepo wa rasilimali nyingi vikiwemo vivutio vya utalii kama Pula Mbili, Kungwi na Mwali, Nyoka Wakubwa na vinginevyo naamini tukiboresha mambo yataenda vizuri,” alisema.
Katibu Tawala huyo alitoa rai kwa wadau mbalimbali kujitokeza kushirikiana na FORVAC katika kuhamasisha uhifadhi wa misitu ya vijiji pamoja na vivutio vilivyopo.
Diwani wa Viti Maalum Halmashauri ya Handeni, Zawadi Bendera alisema atahakikisha anafikisha changamoto za miundombinu kwenye hifadhi ya misitu na vivutio ili kurahisisha kufikika kirahisi.
“Nitalifikisha hili kwenye vikao vya halmashauri tutajadili lakini niombe Wizara ya Maliasili na Utalii kuangalia fursa hii kwa jicho la huruma kwani miundombinu ikiboreshwa tutapata fedha,” alisema.
Mratibu wa FORVAC Kitaifa, Emmanuel Msofe alisema iwapo halmashauri itaamua kutangaza vivutio hivyo itaweza kuongeza mapato hivyo kutekeleza miradi ya maendeleo.
Msofe alisema watatumia Program ya FORVAC katika wilaya 10 wanazotekeleza mradi kuhakikisha fursa zilizopo katika mnyororo wa thamani ya mazao ya misitu inaongezeka.
