Home Mchanganyiko WADAU WA AMANI WATAKIWA KUSHIRIKIANA NA VYOMBO VYA ULINZI NA USALAMA

WADAU WA AMANI WATAKIWA KUSHIRIKIANA NA VYOMBO VYA ULINZI NA USALAMA

0

*************************************

07/11/2019 ZANZIBAR

Mkuu wa Jeshi la Polisi Nchini IGP Simon Sirro amewataka wadau wa amani na
viongozi wa dini kuhubiri suala la amani sambamba na kukemea vitendo vya
mmomonyoko wa maadili katika jamii ikiwemo udhalilishaji, ubakaji na
matumizi ya dawa za kulevya.

IGP Sirro ameyasema hayo leo akiwa kisiwani Zanzibar kwa ziara ya kikazi
ambapo amewataka wananchi na wadau wa amani kushirikiana kwa pamoja na
vyombo vya ulinzi na usalama ili kuifanya nchi kuwa salama.

Kamishna wa Polisi Zanzibar Mohamed Hassan ameeleza kuwa, suala la
kutunza amani ni jukumu la kila mmoja na kwamba ni vyema wananchi kwa
pamoja wakashirikiana na Vyombo vya Ulinzi na Usalama katika kuhakikisha
suala la usalama linazidi kuimarishwa.

Naye Kamishna wa Kamisheni ya Ushirikishwaji wa Jamii CP Mussa Ali Mussa
amesema kuwa, viongozi wa dini ni daraja kati ya waumini na Mwenyezi
Mungu daraja ambalo viongozi wengine hawana.

Hivyo amewataka viongozi wa dini wa madhehebu mbalimbali kuendelea
kuhuisha Kamati za Ulinzi na Usalama katika nyumba za ibada.

Naye askofu wa kanisa la Kianglikana Dk. Michael Hafidh amesema kuwa,
wamejipanga katika kuendelea kuhubiri amani kwa waumini wao hili kuisaidia
jamii kuacha kujihusisha na uvunjivu wa amani na kwamba kwa upande wa
viongozi wa dini anayetaka kujihusisha na masuala ya kisiasa ni vyema
akaachana na kujificha kwenye kivuli cha dini.