Naibu Waziri wa Ardhi Nyumba na Maendeleo ya Makazi Dkt Angeline Mabula akizungumza na viongozi pamoja na watendaji wa sekta ya ardhi kwenye wilaya ya Nyang’hwale akiwa katika ziara yake ya kikazi mkoa wa Geita jana.
Mkurugenzi wa Halmashauri ya wilaya ya Nyang’hwale Mariam Chaurembo akizungumza kwenye kikao baina ya Naibu Waziri wa Ardhi Nyumba na Maendeleo ya Makazi Dkt Angeline Mabula na viongozi pamoja na watumishi wa sekta ya ardhi wakati wa ziara ya kikazi mkoani Geita jana.
Naibu Waziri wa Ardhi Nyumba na Maendeleo ya Makazi Dkt Angeline Mabula akimkabidhi Hati ya Ardhi Afisa wa Polisinye Halmashauri ya Mji wa Geita wakati wa zoezi la kugawa hati kwa wamiliki wa ardhi akiwa katika ziara yake ya kikazi mkoa wa Geita jana.
Meneja Mawasiliano wa Shirika la Nyumba la Taifa (NHC) Muungano Saguya akielezea namna Shirika lake linavyoweza kusaidia ujenzi wa nyumba za watumishi na ofisi kwenye halmashauri mbalimbali nchini wakati wa ziara ya Naibu Waziri wa Ardhi Nyumba na Maendeleo ya Makazi Dkt Angeline Mabula katika halmashauri ya wilaya ya Nyang’hwale mkoani Geita jana.
Naibu Waziri wa Ardhi Nyumba na Maendeleo ya Makazi Dkt Angeline Mabula akiwa katika picha ya pamoja na wananchi wa halmashauri ya Mji wa Geita aliowakabidhi Hati za Ardhi akiwa katika ziara yake ya kikazi mkoa wa Geita jana. (PICHA ZOTE NA WIZARA YA ARDHI)
……………………………………………………………………………..
Na Munir Shemweta, WANMM NYANG’HWALE
Naibu Waziri wa Ardhi Nyumba na Maendeleo ya Makazi Dkt Angeline Mabula ameonesha kutoridhishwa na kasi ndogo ya upangaji na upimaji ardhi katika halmashauri ya wilaya ya Nyang’hwale mkoani Geita.
Akiwa katika ziara yake ya kikazi kukagua utendaji kazi wa sekta ya ardhi kwenye halmashauri hiyo jana, Dkt Mabula alisema kasi ndogo ya upangaji na upimaji maeneo umeifanya halmashauri ya Nyang’hwale kutoa idadi ndogo ya hati za ardhi na hivyo kuikosesha serikali mapato yatokanayo na kodi ya pango la ardhi.
‘’ wilaya ya Nyang’hwale maeneo yake lazima yapangwe na kupimwa vizuri hatuwezi kulialia, hii wilaya mpya iwe wilaya ya mfano kuepuka ujenzi holela’ alisema Naibu Waziri.
Kufuatia hali, Naibu Waziri Mabula aliigiza ofisi ya ardhi mkoa wa Geita kwenda na timu ya wataalamu katika halmashauri hiyo wiki ijayo kusaidia kupanga na kupima maeneo sambamba na kupitia upya ramani za wilaya hiyo ili kuwa na dira itakayokuza Mji wa Nyang’hwale.
Dkt Mabula aliielezwa na Mkurugenzi wa Halmashauri ya wilaya ya Nyang’hwale Mariam Chaurembo kuwa idara ya ardhi kwenye halmashauri hiyo imekuwa na malalamiko mengi hasa kwenye kazi za upimaji maeneo aliyosema yanasababishwa na watumishi wa idara hiyo.
Alisema, pamoja na juhudi zake kuhakikisha maeneo mengi katika wilaya hiyo yanapangwa na kupimwa lakini watumishi wa idara ya ardhi wamekuwa wasumbufu na wakati mwingine huondoka kituo cha kazi bila yeye kujua kwa kisingizo kuwa wako chini ya Wizara ya Ardhi Nyumba na Maendeleo ya Makazi.
Naibu Waziri wa Ardhi alimtaka Mkurugenzi wa Halmashauri ya Nyang’hwale kuwawajibisha watumishi wote wa sekta ya ardhi watakaoonesha utovu wa nidhamu kwake na kusisitiza kuwa pamoja na Wizara yake kuwa na mamlaka ya nidhamu na ajira kwa watumishi wa sekta ya ardhi lakini hawaruhusiwi kuondoka kituo cha kazi bila mkurugenzi kujua.
Katika ziara yake ya kikazi mkoa wa Geita, Naibu Waziri Mabula aliitembelea pia halmashauri ya Mji wa Geita na kukagua Masijala ya Ardhi ambapo alionesha kutoridhishwa na utunzaji wa nyaraka za ardhi alioueleza kuwa unaweza kusababisha migogoro ya ardhi.
