Mwenyekiti wa Kamati ya Ukaguzi ya Wizara ya Ujenzi, Mhandisi Gilbert Mwoga (Wa kwanza kushoto mbele), pamoja na wajumbe wa Kamati hiyo wakikagua mradi wa Ujenzi wa Uwanja wa Ndege wa Kimataifa wa Msalato leo Tarehe 12, Julai 2024, jijini
Dodoma.
Mhandisi Mahona Luhende (WaTatu kushoto) kutoka Wakala wa Barabara (TANROADS) akitoa maelezo kuhusu maendeleo ya mradi wa Ujenzi wa Uwanja wa
Ndege wa Kimataifa wa Msalato kwa Kamati ya Ukaguzi ya Wizara ya Ujenzi, leo Tarehe 12, Julai 2024, jijini Dodoma wakakati Kamati hiyo ilipokagua mradi huo.
Muonekano wa njia ya kuruka na kutua ndege katika Uwanja wa Ndege wa Kimataifa wa Msalato ambapo kwa sasa ujenzi wake umefika asilimia 67.6
Kazi za Ujenzi wa mradi wa Uwanja wa Ndege wa Kimataifa wa Msalato zikiendelea leo Tarehe 12, Julai 2024, jijini Dodoma. Mradi huo kwa sasa umefika asilimia 67.6
Kamati ya Ukaguzi kutoka Wizara ya Ujenzi, ikiwa katika picha ya pamoja na wataalam wanaotekeleza mradi wa Uwanja wa Ndege wa Kimataifa wa Msalato, leo Tarehe 12, Julai 2024, jijini Dodoma mara baada ya kukagua mradi huo.
……
Kamati ya Ukaguzi ya wizara ya Ujenzi imeridhishwa na kasi ya ujenzi wa Uwanja wa Ndege wa Kimataifa wa Msalato mkoani Dodoma ambao umefikia asilimia 67.6 kwa upande wa miundombinu ya njia ya kuruka na kutua ndege huku ujenzi wa jengo la abiria ukifika asilimia 32.21
Hayo yameelezwa na Mwenyekiti wa Kamati hiyo, Mhandisi Gilbert Mwoga wakati wa ziara ya ukaguzi ya Kamati hiyo amabapo pamoja na mambo mengine Kamati imesisitiza kuongeza kasi ya ujenzi ili kuhakikisha mradi huo unakamilika kwa wakati.
“Kamati inaendelea kufuatilia mandeleo ya mradi huu kwa ukaribu ili kuhakikisha ubora na vigezo vilivyowekwa na Serikali vinafikiwa licha ya mradi kuwa nyuma kwa asilimia Tatu lakini bado unaendelea vizuri ikiwemo njia ya kuruka na kutua ndege yenye urefu wa Kilometa 3 na mita 600”, amesema Mhandisi Mwoga
Aidha, Mhandisi Mwoga amemshauri Mkandarasi kuendelea kuwa na mahusiano mema na jamii inayozunguka mradi huo kwa kuendelea kutoa huduma kwa jamii kulingana na mahitaji ya jamii husika ili iweze kunufaika kupitia mradi huo.
Kwa upande wake, Mhandisi Mahona Luhende kutoka Wakala wa Barabara (TANROADS), amesema kuwa mradi huo unajumuisha ujenzi wa jengo la zima moto, Jengo la kuongozea ndege, ujenzi wa maegesho yenye uwezo wa kupokea magari zaidi ya 500, ujezi wa kisima cha kuhifadhia mafuta ya ndege pamoja na jengo la abiria litakalokua na uwezo wa kuhudumia abiria milioni 1.2 kwa mwaka.
Kuhusu suala la ajira, Mhandisi Luhende amesema hadi sasa jumla ya wananchi 608 wamepata ajira katika mradi wa ujenzi wa njia ya kuruka na kutua ndege huku wananchi 947 wakipata ajira katika mradi wa ujenzi wa jengo la abiria ambapo wageni walioajiriwa ni 31 kwa kila mradi na hivyo kufanya wazawa walioajiriwa katika mradi huo kuwa wengi zaidi.
Ujenzi wa mradi huo unahusisha njia ya kuruka na kutua ndege yenye urefu wa Kilometa 3 na mita 600 ambapo unagaharimu kiasi cha shilingi Bilioni 165.6 pamoja na ujenzi wa jengo la abiria ambalo linagharimu kiasi cha shilingi Bilioni 194.4
