Na Mwamvua Mwinyi,Pwani
WATU sita wanashikiliwa na Jeshi la Polisi Mkoani Pwani kwa tuhuma za mauaji yaliyotokana na wivu wa kimapenzi.
Akizungumza na waandishi wa habari ofisini kwake Mjini Kibaha, Kamanda wa Polisi Mkoani Pwani ,ACP Pius Lutumo alisema watu hao walihusika kwenye matukio mawili tofauti.
Lutumo alisema kuwa kwenye tukio la kwanza watu watatu wanashikiliwa kwa tuhuma za kumuua Kasunga Kasunga mkazi wa Kijiji cha Masegombe kata ya Maneromango Wilaya ya Kisarawe.
“Mauaji hayo yalifanyika ikiwa ni kulipa kisasi baada ya marehemu kumtuhumu mmoja wa watuhumiwa hao kuwa na mahusiano na mpenzi wake,”alisema Lutumo.
Alisema kuwa watuhumiwa wote watafikishwa mahakamani mara baada ya upelelezi kukamilika ili kujibu tuhuma zinazowakabili.
Katika tukio lingine watu watatu wanashikiliwa kwa tuhuma za mauaji ya Juma Mkude (25) mkazi wa Kimara Jijini Dar es Salaam.
Alisema kuwa tukio hilo lilitokea Desemba 14 majira ya 20:30 usiku huko Kwa Mathias Wilaya ya Kibaha.
“Marehemu aliuwawa kwa kushambuliwa kwa silaha za jadi fimbo na marungu maeneo mbalimbali ya mwili kutokana na wivu wa mapenzi,”alisema Lutumo.
