…………………………………………….
Mabingwa wa Kihistoria Tanzania Bara timu ya Yanga imeendeleza wimbi la ushindi baada ya kuichapa mabao 2-1 Biashara United kutoka Mkoani Mara mchezo wa Ligi ya NBC uliopigwa katika uwanja wa Benjamin Mkapa jijini Dar es Salaam.
Biashara walikuwa wa kwanza kupata bao la mapema dakika ya 1 likifungwa na mshambuliaji Atupele Green baada ya mabeki wa Yanga kujichanganya.
Mara baada ya Biashara kupata bao Yanga waliliandama lango la wageni kama nyuki mnamo dakika ya 40 Mshambuliaji hatari Fiston Mayele aliisawazishia timu yake kwa pasi nzuri kutoka kwa Shabani Djuma.
Kipindi cha pili kilianza kwa timu zote mbili kufanya mabadiliko hata hivyo wenyeji walinufaika na mabadiliko hayo dakika ya 78 Saido Ntibazonkiza alifunga bao la ushindi kwa mkwaju wa Penalti baada ya winga hatari Jesus Moloko kuchezewa rafu.
Kwa matokeo hayo Yanga wanaendelea kubaki kileleni mwa Msimamo kwa kufikisha Pointi 26 baada ya kucheza mechi 10 huku nafasi ya Pili Simba wakiwa na pointi 21 wakiwa wamecheza mechi 9 huku Biashara wakibaki na Pointi 8 katika nafasi ya 15.
Mchezo mwingine Tanzania Prisons wamepata ushindi ugenini kwa kuwachapa bao 1-0 wenyeji Kagera Sugar.
