Waziri wa Nchi Ofisi ya Rais Tawala za Mikoa na Serikali za Mitaa(TAMISEMI) Mhe Ummy Mwalimu ,akizungumza na Sekretarieti ya Mkoa wa Katavi kwenye ziara ya kukagua utekelezaji wa Miradi ya maendeleo katika maeneo ya afya ya msingi, elimu ya msingi na sekondari na miundombinu ya barabara pamoja na ukusanyaji wa mapato na matumizi iliyofanyika leo Julai 13,2021 .
Baadhi ya wataalam wa Mkoa wa Katavi wakimsikiliza Waziri wa Nchi Ofisi ya Rais Tawala za Mikoa na Serikali za Mitaa(TAMISEMI) Mhe Ummy Mwalimu wakati,akizungumza na Sekretarieti ya Mkoa wa Katavi kwenye ziara ya kukagua utekelezaji wa Miradi ya maendeleo katika maeneo ya afya ya msingi, elimu ya msingi na sekondari na miundombinu ya barabara pamoja na ukusanyaji wa mapato na matumizi iliyofanyika leo Julai 13,2021 .
Waziri wa Nchi Ofisi ya Rais Tawala za Mikoa na Serikali za Mitaa Mhe. Ummy Mwalimu akijadili jambo na Naibu Katibu Mkuu Ofisi ya Rais Tamisemi DKT Grace Magembe katika kikao cha Sekretarieti ya Mkoa wa Katavi kilichofanyika katika ukumbi wa Mikutano wa Halmashauri ya Manispaa ya Mpanda
Mkuu wa Mkoa wa Katavi Mhe Mwanamvua Mrindoko akitoa taarifa ya Mkoa kwenye kikao cha Sekretarieti ya Mkoa na Waziri wa Nchi Ofisi ya Rais Tawala za Mikoa Mhe Ummy Mwalimu
………………………………………………………….
Na. Angela Msimbira KATAVI
Waziri wa Nchi Ofisi ya Rais Tawala za Mikoa na Serikali za Mitaa(TAMISEMI) Mhe Ummy Mwalimu amewaagiza Makatibu Tawala wasaidizi wa Mikoa yote nchini kuhakikisha wanatimiza majukumu yao kikamilifu kwa weledi kwa kuzishauri, kuzisimamia na kutoa maelekezo kwa Mamlaka za Serikali za Mitaa bila uoga ili waweze kutimiza majukumu yao kikamilifu.
Ametoa maagizo hayo leo katika kikao na Sekretarieti ya Mkoa wa Katavi kwenye ziara ya kukagua utekelezaji wa Miradi ya maendeleo katika maeneo ya afya ya msingi, elimu ya msingi na sekondari na miundombinu ya barabara pamoja na ukusanyaji wa mapato na matumizi katika Halmashauri katika Mkoa wa Katavi.
Waziri Ummy amesema Makatibu Tawala wasaidizi wa Mikoa ni wakubwa zaidi kuliko Wakurugenzi wa Halmashauri, hivyo wanawajibu wa kuhakikisha wanawasimamia na kuwapa maelekezo ili kuweza kutoa matokeo chanya katika utekelezaji wa majuku yao ya kutoa huduma bora kwa wananchi.
Ameendelea kusema kuwa Makatibu Tawala Wasaidizi wa Mikoa wanawajibu kuzisimamia, kuzishauri na kutoa maelekezo kwa Halmashauri 184 ili Ofisi ya Rais-TAMISMI kuendelea kutafuta rasilimali watu, rasilimali fedha na kupanga mikakati ya maendeleo itakayotekelezwa katika Mamlaka za Serikali za Mitaa.
Waziri Ummy amesema kuwa Wataalam wa Mikoa ndiyo injini ya kusimamia utekelezaji wa Miradi ya maendeleo katika Mamlaka za Serikali za Mitaa, hivyo wanawajibu wa kushauri na kutoa maelekezo ili kuleta maendeleo katika Halmashauri.
“Ninawaagiza kuhakikisha mnahoji kwa undani bajeti za Mamlaka za Serikali za Mitaa kwa kuangalia vipaombele vya Serikali ambavyo vinasaidia kutatua changamoto za wananchi lengo likiwa ni kuziwezesha hizi Halmashauri kuweza kutimiza majukumu yao” amesema Waziri Ummy
Aidha, Waziri Ummy amesema katika kuhakikisha Sekretarieti za Mikoa , Serikali imeteua Wakuu wa Idara za Mipango na Uratibu watano (5) waliofanya vizuri katika Mamlaka za Serikali za Mitaa na kuwapeleka Sekretarieti za Mikoa ili kuhakikisha kunakuwa na watumishi wenye weledi na kuondoa dhana kuwa watumishi walioshindikana Wizarani ndio hupelekwa Mikoani.
