๐๐ช๐ณ๐ข๐ฅ๐ช ๐บ๐ข ๐ฎ๐ข๐ซ๐ช, ๐ถ๐ฎ๐ฆ๐ฎ๐ฆ ๐ฏ๐ข ๐ฆ๐ญ๐ช๐ฎ๐ถ yaemdelea ๐ซ๐ช๐ฎ๐ฃ๐ฐ๐ฏ๐ช ๐ฉ๐ถ๐ฌ๐ฐ ๐ฌ๐ถ๐ฑ๐ช๐ต๐ช๐ข ๐ช๐ญ๐ข๐ฏ๐ช ๐บ๐ข ๐๐๐
NA JOHN BUKUKU- MULEBA
Mgombea ubunge wa Jimbo la Muleba Kaskazini kupitia Chama Cha Mapinduzi (CCM), Adonis Alfred Bitegeko, amesema kuwa utekelezaji wa miradi ya maendeleo katika jimbo hilo umeendelea kwa kasi kubwa, kutokana na juhudi za serikali ya awamu ya sita chini ya uongozi wa Dkt. Samia Suluhu Hassan.
Amesema kuwa katika kipindi cha miaka michache iliyopita, serikali imewekeza nguvu kubwa katika sekta za maji, umeme, miundombinu na elimu, hatua ambayo imeleta mabadiliko makubwa katika maisha ya wananchi wa Muleba Kaskazini.
Aidha, Bitegeko amebainisha kuwa miradi ya maji vijijini imeendelea kupanuka, huku serikali ikihakikisha huduma hiyo muhimu inawafikia wananchi kwa wakati, jambo linalosaidia kupunguza changamoto za upatikanaji wa maji safi na salama.
Amesema kuwa katika sekta ya nishati, kazi ya kuimarisha miundombinu ya umeme katika kata nne za jimbo hilo inaendelea vizuri, hatua inayochochea shughuli za uzalishaji na kuongeza kipato cha wananchi.
Kuhusu elimu, Bitegeko amesema kuwa ujenzi wa mabweni katika shule za sekondari umefikia asilimia 50, jambo linaloashiria dhamira ya serikali kuboresha mazingira ya kujifunzia kwa wanafunzi na kupunguza changamoto za umbali kwa wanafunzi waishio maeneo ya mbali.
Aidha, amebainisha kuwa serikali inaendelea kushughulikia mgogoro wa muda mrefu wa ardhi unaohusisha vitalu vya Muleba Kaskazini, kwa lengo la kuhakikisha wananchi wanaishi kwa amani na kuendeleza shughuli zao za kiuchumi bila migogoro.
Bitegeko ameongeza kuwa wananchi wa Muleba Kaskazini wameendelea kuunga mkono juhudi za serikali ya CCM kwa vitendo, kwa kutambua kuwa sera na ilani yake zimekuwa chachu kubwa ya maendeleo katika maeneo yote ya jimbo hilo.
