Naibu Waziri wa Elimu, Sayansi na Teknolojia, Mhe. Omary Kipanga akikagua maendeleo ya mradi wa ujenzi wa Chuo cha VETA Kagera wakati alipotembelea mradi huo hivi karibuni.
Naibu Waziri wa Elimu, Sayansi na Teknolojia, Mhe. Omary Kipanga akiongea na wananchi mara baada ya kumaliza kukagua mradi wa ujenzi wa Chuo cha VETA Kagera wakati alipotembelea mradi huo hivi karibuni.
Mkurugenzi Mkuu wa VETA, Dkt. Pancras Bujulu akitoa taarifa ya mradi wa ujenzi wa Chuo cha VETA Kagera wakati Naibu Waziri wa Elimu, Sayansi na Teknolojia, Mhe. Omary Kipanga (hayupo pichani) alipotembelea mradi huo.
Baadhi ya wananchi wakisikiliza taarifa ya mradi wa ujenzi wa Chuo cha VETA Kagera iliyosomwa na Mkurugenzi Mkuu wa VETA, Dkt. Pancras Bujulu (hayupo pichani) wakati Naibu Waziri wa Elimu, Sayansi na Teknolojia, Mhe. Omary Kipanga alipotembelea mradi huo hivi karibuni.
Muonekano wa hatua ya ujenzi iliyofikiwa kwa baadhi ya majengo yanayojengwa katika Chuo cha VETA Kagera.
………………………………
Na WyEST
# Kudahili wanafunzi 1,400
# Ujenzi kukamilika Novemba Mwaka huu
Ujenzi wa Chuo cha Ufundi Stadi na Huduma cha Mkoa wa Kagera (Kagera RVTSC) kinachojengwa nchini kwa ufadhili wa Serikali ya Jamhuri ya Watu wa China unatarajia kukamilika ifikapo Novemba 27 mwaka huu.
Hayo yamesemwa na Naibu Waziri wa Elimu, Sayansi na Teknolojia, Mhe. Omary Kipanga akiwa ziarani mkoa wa Kagera ambapo ametembelea kuona maendeleo ya mradi huo na kuridhishwa na hatua iliyofikiwa pamoja na kiwango cha ujenzi.
Amesema chuo hicho kikikamilika, kwa awamu ya kwanza kitakuwa na uwezo wa kudahili jumla ya wanafunzi 400 wa kozi ndefu na wanafunzi 1,000 wa kozi fupi na kwamba kitaweza kutoa huduma ya malazi kwa wanafunzi 360.
Mhe. Kipanga amesema Serikali pia inajenga vyuo vya aina hiyo katika mikoa ya Rukwa, Njombe, Geita na inakusudia kujenga katika mkoa wa Simiyu. Lengo ni kuhakikisha kila mkoa unakuwa na chuo kikubwa cha umahiri ambacho kitatoa mafunzo ya kozi maalum kulingana na mazingira na shughuli za kiuchumi za Mkoa husika.
“Mfano hapa Kagera kuna ziwa kwa hiyo tunatarajia chuo hiki pamoja na kozi nyingine, kitoe kozi za uvuvi na kilimo kwa kuwa hapa mnalima kahawa, migomba na mazao mengineyo,” amesisitiza Mhe. Kipanga.
Awali, akitoa taarifa ya mradi huo, Mkurugenzi Mkuu wa Mamlaka ya Elimu na Mafunzo ya Ufundi Stadi (VETA), Dkt. Pancras Bujulu amesema mradi huo unahusisha ujenzi wa majengo, ununuzi wa mitambo na zana za kufundishia na kujifunzia pamoja na uwekaji wa samani.
Amesema mradi unatekelezwa kwa gharama ya zaidi ya Shilingi bilioni 22 na kwamba kwa ujumla mpaka sasa utekelezaji wa mradi umefikia asilimia 80.
Naye Meneja Msaidizi wa kampuni ya Shanxi Construction Investment Group ya China ambayo ndiyo inayotekeleza ujenzi wa mradi huo, He Tianan ameshukuru kutembelewa na kiongozi huyo na ameahidi kukamilisha ujenzi kwa wakati uliopangwa.
