Home Mchanganyiko TIC YATOA WITO KWA WATANZANIA KUTUNZA MAENEO YA UWEKEZAJI

TIC YATOA WITO KWA WATANZANIA KUTUNZA MAENEO YA UWEKEZAJI

0

……………………………………………….

Na Mwandishi Wetu, Ruvuma.

Kituo cha Uwekezaji Tanzania-TIC kimewataka wakazi waishio jirani na maeneo yaliyotengwa kwa ajili ya Uwekezaji nchini kutunza maeneo hayo ili yaweze kuchochea uchumi wa Taifa kutokana na Uwekezaji unaotarajiwa au uliofanywa kuweza kuimarika 

Wito huo umekuja kufuatia kubainika kwa changamoto ya uchomaji wa mashamba ya jirani na  maeneo yalipo mashamba ya Kampuni  ya Uwekezaji ya Aviv ambayo ni Kampuni tanzu ya Olam inayojihusisha na Uwekezaji wa kilimo cha Kahawa, kitendo kinachodaiwa kufanywa na wakazi waishio kwenye maeneo ya jirani.

Katika ziara yake mkoani Ruvuma, Mkurugenzi Mtendaji wa Kituo cha Uwekezaji Tanzania-TIC Dkt. Maduhu Kazi alitembelea katika mradi huo mkubwa wa uwekezaji na kuelezwa changamoto hiyo.

“Niwaombe wakazi wanaoishi jirani na maeneo ya Uwekezaji, wayatunze maeneo hayo kwani ni muhimu sana, hii itasaidia kukuza Uwekezaji na kuongeza ajira” alisema Dkt.Kazi  

Makamu Meneja Mkuu wa Kampuni ya Aviv Bw. Steve Kamau alisema licha ya kuwa na uzalishaji mzuri lakini changamoto hiyo ya uchomaji wa mashamba ya jirani imekuwa ikiwasumbua sana, hata hivyo amekiri kupata ushirikiano toka ngazi ya Mkoa kuweza kukabili changamoto hiyo mara inapotokea.

“Sisi tunawekeza kwenye Kahawa, sasa hivi tumepanda hekta 2,000 za Kahawa aina ya Arabica, tulianza uzalishaji mwaka 2012 hadi 2015, mwaka 2016 tulianza kuvuna. Mwaka huu wa 2020 tumezalisha tani 1,500. Hata hivyo, changamoto ya uchomaji moto mashamba inayofanywa na jirani zetu inaathiri sana kilimo chetu cha Kahawa” alisema Bw.Kamau.

Kampuni hiyo ya Aviv imekuwa ikishirikiana na jamii katika kuimarisha huduma za jamii ikiwepo ujenzi wa shule na zahanati, huduma za maji Safi na salama ambapo kwa mwaka hutumia kiasi cha Dola za Kimarekani zipatazo 12,000 kwa huduma za jamii. Katika uwekezaji huo imetoa ajira za kudumu kwa wakazi 434.

Dkt Maduhu alitumia fursa hiyo kumwomba Mwekezaji huyo kufikiria pia kuwekeza katika usindikaji wa mazao ya chakula, kwa mfano Mkoa una ziada ya uzalishaji wa mahindi unaofikia tani 116,660 kwa mwaka, kiasi ambacho ni kikubwa.