Naibu Katibu Mkuu Ofisi ya Rais-TAMISEMI, ambaye pia ni Mjumbe wa TASAF, alipokuwa akifungua warsha hiyo kwa viongozi ngazi ya Halmashauri.
………………………………………………………………………..
Na. Mwandishi wetu- DODOMA
Serikali imewataka wawezeshaji wa ngazi ya Halmashauri watakaoshiriki zoezi la kuhakiki kaya maskini kupitia mpango wa kunusuru kaya maskini kufanya kazi hiyo kwa weledi na kuhakikisha matumizi ya teknolojia yanakuwa na manufaa kwa kazi waliyokabidhiwa.
Akizungumza katika ufunguzi wa mafunzo kwa watendaji hao, Mjumbe wa Mfuko huo, ambaye pia ni Naibu Katibu Mkuu Ofisi ya Rais-TAMISEMI, anayeshughulikia masuala ya Afya, Dkt. Dorothy Gwajima, amesema matumizi ya vishkwambi iwe chachu ya kubadili utendaji wa kazi zao wakati wa kuwasajili watu wanaostahili kuingia katika mpango huo.
“Leo mnapokea mafunzo na kuwezeshwa ili baada ya hapa mkawaeleweshe wananchi kusudi zuri la serikali na nia njema ya Rais wa Jamhuri ya Muungano wa Tanzania juu yao, kwamba mkono wake haujawaacha unawagusa mahali walipo.” Amesema Gwajima na kuongeza,
“Hatutaki kusikia tena kaya zisizo na sifa au hewa katika ardhi ya Tanzania, huku Afisa mwenye dhamana ya usimamizi akiwa amekaa ofisini, ili hali amezungukwa na kaya hewa, hilo haliwezekani” amekemea Dkt. Gwajima.
Dkt. Gwajima amesema watakaoshindwa kuzingatia itabidi watoe maelezo ya kina kwa namna gani walisimamia na kutenda majukumu waliyopewa, na kama mtu ataonekana ni sehemu ya kusababisha tatizo, basi gharama yake itakwenda kwa aliyevunja sheria, taratibu na kanuni.
Katika jitihada ya kuona mpango huo unakwenda vizuri wataalam wasimamizi wa kaya maskini ngazi ya Halmashauri wamepatiwa vishkwambi, ili viweze kuwarahisishia shughuli za utendaji, ambavyo vitatumika kuwabaini walengwa wenye sifa na wasio na sifa.
“Ifahamike kwamba wananchi wengi katika maeneo yao wanafahamiana, hivyo hata kubaini nani alifanya tofauti kwa kuingiza mtu asiyehusika itakuwa rahisi kwa kutumia vishkwambi hivi kwa maana itajulikana wazi mtaalamu aliyeidhinisha sifa za mlengwa husika anayedaiwa kuwa ni hewa. Kwa mantiki hii vishkwambi vikawe ndio chachu ya maboresho,” alisema Dkt. Gwajima.
Amewataka watalam hao kuwatumia vyema, Watendaji Vijiji na Mitaa ili kufanikiwa katika kutekeleza majukumu yao kwani wao ndio wanaoishi na jamii kwa karibu.
Mjumbe huyo wa TASAF, Dkt. Gwajima, amesema atashangazwa sana na wakuu wa Idara ambao ni mahiri katika kuelezea mafanikio na kutambua takwimu za maeneo yao ya kazi halafu washindwe kutambua walengwa wa mpango wa kunusuru kaya maskini kwenye eneo lake analosimamia mfano, wewe ni Afisa Mifugo ujue idadi ya mifugo yote ushindwe kujua idadi ya mifugo inayomilikiwa ba walengwa wa mpango wa kunusuru kaya maskini” alisema Dkt. Gwajima.
“Mathalani wewe ni mkuu wa idara ya Afya, Kilimo, Ustawi wa Jamii, Mwanasheria, nk. unakwenda kufanya shughuli zako lakini suala la TASAF umeliweka pembeni na halitoki kwenye taarifa zako hilo litakuwa ni tatizo” Amesema Dkt. Gwajima.
Mafunzo hayo kwa wataalam hao katika mpango wa TASAF kipindi cha pili cha awamu ya tatu yamefanyika katika Shule ya Sekondari Umonga jijini Dodoma.
