NA MWAMVUA MWINYI,PWANI
MKUU wa Mkoa wa Pwani Mhandisi Evarist Ndikilo amemuagiza mganga mkuu wa mkoa (RMO) kuandika barua kuomba kibali Wizara ya afya ili kutuma tume kuchunguza mtoto aliyechomwa sindano na kupooza mgumu.
Ndikilo aliyasema hayo mjini Kibaha wakati alipofanya mkutano wa wazi wa kusikiliza matatizo na kero mbalimbali za wananchi ambapo mama wa mtoto huyo Asha Juma alitoa kilio cha mwanae mbele ya mkuu huyo wa mkoa
Akielezea juu ya tukio la mwanae Asha Juma aitwaye Abbas Msosa (14) ambaye anasoma kidato cha kwanza shule ya sekondari Bundikani Wilayani Kibaha alisema kuwa mwanaye alikuwa akiumwa na alimpeleka kituo cha afya mkoani kwa ajili ya matibabu.
Juma alisema kuwa alipokuwa anapatiwa matibabu alichomwa sindano ambayo ilimsababishia maumivu na kusababisha mguu wake kupooza kutokana na kuchomwa sindano ya Quinini alipokuwa akiumwa Maleria miaka tisa iliyopita.
“Naomba suala langu lishughulikiwe kwani hata majibu ninayopewa na waliohusika na suala la mtoto wangu wananipa majibu ambayo hayaridhishi ninachokitaka ni kupata haki ya mtoto wangu ambaye amepata matatizo kutokana na matibabu aliyopewa,” alisema Juma.
“Nimezunguka sana kwenda kwenye kituo hicho cha afya cha Mkoani lakini sipati majibu yanayoeleweka nakuomba unisaidie nateseka sana kwani nahangaika na mwanangu na sina msaada wowote nakuomba unisaidie nipate haki ya mwanangu,” alisema Juma.
Kwa upande wake mkuu wa mkoa Mhandisi Evarist Ndikilo alisema kuwa suala hilo analifahamu kuwa mtoto wake alipatiwa matibabu kwenye kituo hicho cha afya na baada ya mwanae kuchomwa sindano alipatwa na tatizo hilo.
“Lifanyiwe kazi na kama kuna mtu ambaye alizembea na kusababisha tatizo hili ili hatua za kinidhamu zichukuliwe kwani kwa sasa hatuwezi kutoa majibu kujua kama ni uzembe au la hili likitolewa ufafanuzi na wataalamu itakuwa ni vizuri ili liweze kwisha kwani lazima kuwe na majibu ambayo yatakuwa ni ya kitaalamu,”alisema Ndikilo.
Alisema kuwa suala hilo limekuwa la muda mrefu sana na mama huyo amekuwa akihangaika sana na ameshafika ofisini kwake mara kwa mara na ameshamsaidia hivyo kuna haja ya kuhakikisha linafikia mwisho ili naye aweze kurizika kwani anaona kama hajapata haki yake.
